Titulli: Economicus, Rritje apo zhvillim, nr. 3
Origjinali: Economicus, Rritje apo zhvillim, nr. 3
Gjinia: Revistë shkencore
Kryeredaktor: Adrian Civici
Shtëpia botuese: UET Press
Viti: 2009
Fq. 178
Pesha: 0.282 kg
Koment nga Adrian Civici
Revista "Economicus" është një botim me karakter shkencor dhe informativ i Fakultetit të Ekonomisë të Universitetit Europian të Tiranës. Qëllimi kryesor i saj është pasqyrimi i realiteteve, arritjeve dhe sfidave të reja në fushën e zhvillimeve ekonomike, financiare e sociale në Shqipëri dhe në botë, nxitja e kërkimit, debatit shkencor dhe propozimeve efektive në këto fusha.
Në mënyrë të veçantë revista "Economicus" synon krijimin e një forumi aktiv të mendimit ekonomik në Shqipëri, synon angazhimin më të gjerë e më konkret të gjithë komunitetit të ekonomistëve e financierëve shqiptarë në Shqipëri apo jashtë saj në trajtimin e problematikës së zhvillimit ekonomiko – social, financave publike dhe tregjeve financiare në përgjithësi, stabilitetit makroekonomik, politikave ekonomike e financiare, zhvillimit social e territorial, kredisë dhe bankave, sistemeve të sigurimeve dhe pensioneve, çmimeve dhe inflacionit, efektet dhe kërkesat në kuadrin e integrimit evropian, ndikimet dhe përballja me zhvillimet e ekonomisë botërore dhe globalizimit etj.
Një vend të rëndësishëm në përmbajtjen e saj do të kenë analizat për eksperiencat bashkëkohore ndërkombëtare në fushën e politikave ekonomike e sociale, trajtimi teorik e aplikativ i ideve, debateve e politikave më të mira në fushat e sipërpërmendura etj. Ekonomistët më të shquar të botës dhe analiza e teorive dhe kontributit të tyre në shkencat ekonomike do të jetë një tjetër rubrikë e përhershme në faqet e revistës "Economicus".
Pedagogë, kërkues të shkencave ekonomike të Universitetit Europian të Tiranës apo të universiteteve të tjera publike dhe private, studiues dhe ekspertë të institucioneve të ndryshme që në fokusin e tyre kanë ekonominë, financat dhe zhvillimin në përgjithësi janë të ftuar ta përdorin këtë revistë për të publikuar idetë dhe studimet e tyre, për të debatuar apo për të hedhur pikëpamje të reja në debatin ekonomik bashkëkohor.
Mbi revistën
Në këtë numër janë paraqitur artikujt: "Koncepti dhe rebusi i politikave të zhvillimit" të Adrian Civicit; "Rritje apo zhvillim" të Luljeta Minxhozit; "Zhvillimi ekonomik në retrospektivë dhe në perspektivë" të Selami Xhepës; "Zhvillimi i qëndrueshëm dhe sfidat mjedisore" të Juliana Latifit; "Sfidat drejt ruajtjes së rritjes" të Gjergj Filipit; "Paradigma e zhvillimit njerëzor dhe tranzicioni post – komunist" të Eno Ngjelës; "Kapitali njerëzor dhe zhvillimi, rast shqiptar" të Blerta Picarit; "Politikat e zhvillimit të zonave rurale dhe të defavorizuara" të Shkëlzen Markut dhe Tomi Treskës; "A është barazia ekstreme një objektiv për t'u mburrur" të Fatmir Gurit, Adrian Civicit dhe Anne M. Jouve; "Liria ekonomike si faktor përcaktues të flukseve hyrëse të IHD" të L. Thoma dhe Eda Lugës; "Pronësia kombëtare, faktor kyç për efektivitetin e ndihmës së huaj" të Evis Gjebreas; "Project finance në vendet në zhvillim" të Ermela Kripës; "Pronësia intelektuale, një koncept i hershëm dhe modern" të Kreshnik Bellos dhe "Ekonomia e dijes, SHBA dhe Evropa me shpejtësi të ndryshme" të Evis Sulkos.
