Titulli: Economicus, Sektori publik në udhëkryq, nr. 1
Origjinali: Economicus, Sektori publik në udhëkryq, nr. 1
Gjinia: Revistë shkencore
Kryeredaktor: Adrian Civici
Shtëpia botuese: UET Press
Viti: 2008
Fq. 112
Pesha: 0.336 kg
Koment nga Adrian Civici
Revista "Economicus" është një botim me karakter shkencor dhe informativ i Fakultetit të Ekonomisë të Universitetit Europian të Tiranës. Qëllimi kryesor i saj është pasqyrimi i realiteteve, arritjeve dhe sfidave të reja në fushën e zhvillimeve ekonomike, financiare e sociale në Shqipëri dhe në botë, nxitja e kërkimit, debatit shkencor dhe propozimeve efektive në këto fusha.
Në mënyrë të veçantë revista "Economicus" synon krijimin e një forumi aktiv të mendimit ekonomik në Shqipëri, synon angazhimin më të gjerë e më konkret të gjithë komunitetit të ekonomistëve e financierëve shqiptarë në Shqipëri apo jashtë saj në trajtimin e problematikës së zhvillimit ekonomiko – social, financave publike dhe tregjeve financiare në përgjithësi, stabilitetit makroekonomik, politikave ekonomike e financiare, zhvillimit social e territorial, kredisë dhe bankave, sistemeve të sigurimeve dhe pensioneve, çmimeve dhe inflacionit, efektet dhe kërkesat në kuadrin e integrimit evropian, ndikimet dhe përballja me zhvillimet e ekonomisë botërore dhe globalizimit etj.
Një vend të rëndësishëm në përmbajtjen e saj do të kenë analizat për eksperiencat bashkëkohore ndërkombëtare në fushën e politikave ekonomike e sociale, trajtimi teorik e aplikativ i ideve, debateve e politikave më të mira në fushat e sipërpërmendura etj. Ekonomistët më të shquar të botës dhe analiza e teorive dhe kontributit të tyre në shkencat ekonomike do të jetë një tjetër rubrikë e përhershme në faqet e revistës "Economicus".
Pedagogë, kërkues të shkencave ekonomike të Universitetit Europian të Tiranës apo të universiteteve të tjera publike dhe private, studiues dhe ekspertë të institucioneve të ndryshme që në fokusin e tyre kanë ekonominë, financat dhe zhvillimin në përgjithësi janë të ftuar ta përdorin këtë revistë për të publikuar idetë dhe studimet e tyre, për të debatuar apo për të hedhur pikëpamje të reja në debatin ekonomik bashkëkohor.
Mbi revistën
Në këtë numër janë paraqitur artikujt: "Kapitullimi pa kushte i sektorit publik" të Henri Çilit; "Sektori publik, reformat që nuk duhen vonuar" të Arben Malaj; "Roli dhe kontributi i ekonomistëve në shoqëritë moderne" dhe "Sektori publik, qeverisja dhe performanca" të Adrian Civicit; "Evropa në kërkim të ekonomisë së dijes" të Gjergj Filipit; "Taksa e sheshtë dhe sjellja ekonomike" të Selami Xhepës; "Potenciali i arsimit privat" të Ermal Hasimjas; "Shëndetësia, rruga e gjatë drejt së mirës" të Eduart Hashorvës; "Sektori bankar si model suksesi i menaxhimit privat" të Artan Santos; "Sfidat dhe problemet e formimit të menaxherëve" të Fatmir Memaj; "Administrimi i eksternaliteteve midis shtetit dhe tregut" të Fatmir Gurit dhe "Integrimi evropian dhe roli i Bankës së Shqipërisë" të Ina Krajas dhe Niuton Mulletit. Gjithashtu, në këtë numër paraqitet edhe një material rreth fituesve të çmimit Nobel në ekonomi duke u përqendruar në profilin e Amartya Sen, ekonomistit të mirëqenies.
