Vrima, Rita Petro

Titulli: Vrima
Origjinali: Vrima
Gjinia: Poema
Autori: Rita Petro
Shtëpia botuese: Albas
Viti: 2014
Fq. 116
Pesha: 0.231 kg.
ISBN: 978-9928-02-461-9 

Mbi librin

Ky libër synon të zbulojë poetikisht skutat më të errëta të ndërgjegjes universale dhe të shpirtit njerëzor. Në qendër të harmonisë së trupave qiellorë dhe të trupave njerëzorë vendoset Erosi, prania e të cilit ndihet në çdo varg të librit si amësi dhe si sensualietet femëror.

Të shtatë elementet që përbëjnë jetën janë përdorur si detaje për universin poetik të librit Vrima: Ujë – Tokë – Ajër – Zjarr – Zot – Grua – Burrë. Me art e në mënyrë kontraverse poetja thyen tabutë që lidhen me moralin, gojëdhënat, botëkuptimet filozofike të ekzistencës, duke provokuar deri në ekstrem intelektin dhe ndjesitë e lexuesit.

Edhe në situatat më romantike ajo nuk i përkëdhel ndjenjat, por i trondit ato. I gjithë libri pulson nga ekstaza e dashurisë, që është gjendja e krijimit dhe që poetja e krahason me dhimbjen e lumturinë që ndien femra kur nxjerr në jetë fëmijën.

Komente mbi librin

"Libri që na ka mbledhur sot mban një titull metaforik "Vrima" duke shënuar kështu një qasje ta quaj postmoderne (por në thelb është realiste, në mos natyraliste). Vrima në këtë rast është ajo pika e fillimit ose ajo pika ku ngulet kompasi kur vizatojmë një rreth, është qendra e seksualitetit femëror që kthehet në një optikë mbi gjërat me të cilat një femër ndeshet dhe jeton në jetën e saj... Lexuesi do të befasohet me pikëpamjen e re mbi lindjen dhe sidomos me gjuhën poetike, po e quaj poetikisht "të lëngshme" të poezisë "Dalja", ku është individi i porsalindur (femra) ajo që sulmon botën ta pushtojë..."

Zejnullah Rrahmani

"Autorja triumfon artistikisht me veprën e saj falë lirisë së egos që ka, jeton diku ku nuk ka smirë, egoizëm, vrasje, kriza, ajo bën jetën nën mbretërinë e pakushte të pasionit, diku në thellësinë e natyrës njerëzore, ku s'ka ideologji as diktaturë, kah nuk ka qarkulluar bibël as kuran – ajo sfidon edhe klerin, ideja e zotit tek autorja është robëri shpirti, gjë që ajo nuk e përfill duke sajuar harmoninë e artit përmes farës së lirisë shpirtërore.

Në librat e saj erosi evulon nga vargu në varg, merr forcë nga faqja në faqe dhe krijon imazhe vizuale pa kompleks, pamjet që i sjellë leksiku – shpesh anatomik dhe i drejtpërdrejtë. Përkundër një vije frymëzimi, autorja nuk rrëshqet në banalitet, në irritim dhe nuk bën shkarje motivimi , nuk hesht as kur do të heshtnin të gjithë, erosi i saj sulmon pahiri dhe spontanisht.

Artistikja e saj është e madhe sa pangopshmëria me dashuri. Ajo është erosi vet. Libri nis me Daljen nga muret e mishta për të udhëtuar vazhdimisht kah dorëzimi i trupit e shpirtit nëpër zonën e ndaluar, ku rri fshehur liria. Rita ka shkruar libra që përfaqësojnë diçka në letërsinë shqipe lirinë krijuese, feminilitetin si triumf bashkë me elokuencën e krijimit dashuror, jo si afeksion por si qëllim."

Dije Demiri Frangu

"Figura e Vrimës në modelin e përzgjedhur të jetës bëhet figurë e brendësisë jetësore. Shkurt, nga kjo figurë e përzgjedhur, poezia e Rita Petros jep modelin universal, pra dhembjen universale, e cila në shenjë formohet e strukturohet nga një tërësi e veçantë poetike postmoderne.

Gjithçka personalizohet e neutralizohet në poetikën e shkrimit. Kujtimet neutralizohen së bashku me empirinë, duke e formuar e ruajtur gjithnjë kosmogonin, për t'u mbarështuar në gjuhën poetike.

Me atë çka ka krijuar, ka sjellë një model të femrës së lirë në shprehje të përjetimit në poezi, të femrës inteligjente në nuhatje të gjërave, që nuk bërtet rrugëve, por që guxon dhe provon të hedhë një hap më shumë se të tjerat, duke sfiduar çdo mentalitet dhe çdo sfidë në jetën tonë plot paragjykime."

Flamur Maloku