Titulli: Vepra letrare e Martin Camajt
Origjinali: Vepra letrare e Martin Camajt
Gjinia: Studim letrar
Autori: Anton Nikë Berisha
Shtëpia botuese: Princi
Viti: 2010
Fq.232
Pesha: 0.291 kg
ISBN: 978-99956-732-6-0
Mbi librin
Vepra letrare e Martin Camajt hyn në rrethin më të ngushtë të krijimeve më artistike të letërsisë sonë. Ajo është fryt i një imagjinate të pasur dhe i një pune krijuese e të bërë me përkushtim, krijuar në vazhdimësi në një periudhë mbi dyzetvjeçare në kushte e në rrethana të veçanta dhe në vende të ndryshme.
Vepra e tij letrare (15 vepra) është për shumëçka e papërsëritshme dhe komplekse: një botë e pasur tematike dhe motivore, me një strukturë gjuhësore dhe poetike dhe me një sistem shprehës kuptimor origjinal e të mëvetësishëm, perceptimi i së cilës kërkon më tepër dije e përkushtim sesa leximi i një vepre të zakonshme letrare.
Ajo është e mbrujtur dhe frymon me botën dhe me mendësitë shqiptare; në qenësinë e saj është një dialog artistik me të, me vetëdijen historike dhe me vetëdijen mitike dhe njëherësh një botë e një vizioni të ri artistik. Imazhi poetik i Martin Camajt zë fill me vendlindjen e fëmijërinë, me njerëzit e tij, pastaj shtrihet e zgjerohet me Dukagjinin e me Atdheun, me të cilët ishte fort i lidhur shpirtërisht, por edhe me botën arbëreshe, të cilën po ashtu e çmoi dhe e deshi shumë.
Në qoftë se sipas Blejkut poezia është "alegori që i drejtohet forcave intelektuale" e gjithë vepra e Camajt është e tillë; ajo ngërthen synimin dhe përcaktimin, siç do të thoshte Northorp Fraj, që "Vepra e imagjinatës na prezanton një vizion, jo të madhështisë personale të poetit, por të një gjëje jopersonale dhe shumë më madhështore: vizionin e një akti të vendosur të lirisë shpirtërore, vizionin e rikrijimit të njeriut". Në këtë plan Martin Camaj është shembull i rrallë në letërsinë tonë.
