Ëndrra si re, Marg Shilipa

Titulli: Ëndrra si re
Origjinali: Ëndrra si re
Gjinia: Poezi
Autori: Marg Shilipa
Shtëpia botuese: Ombra GVG
Viti: 2015
Fq. 140
Pesha: 0.208 kg.
ISBN: 978-9928-06-108-9

Komente mbi librin

"Marga qëndis si nikoqire e mirë një oqean të thellë ritmesh e ndjenjash, duke ia dhuruar lexuesit me forcën dhe delikatesën e gruas. Ajo end ngadalë, vargje pa bujë, shpesh herë e mbyllur brenda guaskës intime, ashtu si zogjtë thurin me art majë pemëve të larta foletë e tyre, për të qenë më pranë yjeve dhe qiellit.

Ky është mikrokozmosi i Marg Shilipas, duke mos rreshtur së kujtuari se është edhe Penelopë, në pritje ankthi, përjetësisht e dashuruar. Ajo e përpunon fjalën si një mjeshtër filigranën dhe që si bazament të tekstit ka vetveten. Ajo arrin të vizatojë poetikisht, gjithçka të bukur që natyra fal, duke i "përkthyer" me vargje emocionuese udhën e përjetimit.

Si grua e ndjeshme ajo e vendos gishtin mbi plagët e malcuara të shoqërisë, e bindur se nëse secila prej nesh do ta bënte me zell detyrën e saj e do të ishte në kohën dhe vendin e duhur, padyshim që kjo botë që e jetojmë do të ishte edhe me e bukur, sepse do të ishte e përkëdhelur nga duar femre."

Vasilika Tafa

"Ndryshe nga tendencat feministe të poezisë së grave veçanërisht gjatë dekadave të fundit në kërkim të një individualitetit gjinor, nganjëherë me forcë dhe imponues, poezia e Marg Shilipas përkundrazi, afron më tepër me post – feminizmin, me pranimin e faktit që një grua e bën të plotë dashuria e burrit.

Por, hollë – hollë, ky këndvështrim mendoj se reflekton filozofinë e ambientit ku është rritur, traditën arbëreshe, familjen arbëreshe... Marg Shilipa shkruan me një diksion të thjeshtë, gati minimalist, që do të ishte një zgjedhje e rrezikshme për çdo poet.

Por, poezitë e saj nuk bëhen kurrë të mërzitshme; përkundrazi ajo arrin të ndërtojë një marrëdhënie intime me lexuesin, falë kryesisht një sintakse të zhdërvjelltë dhe bindëse, kapërcimeve nga shprehja emocionale tek përshkrimi, për të arritur pastaj më të mirën e vet, në poezitë narrative, ku gjejmë një ndërhyrje me elementë të dramaturgjisë... në stil, situatë dhe karaktere.

Dhe pas leximit të parë literal, pas kësaj gjuhe të thjeshtë, një lexim i dytë, zbulon gradualisht nënshtresa të tjera kuptimore; pas një imazhi apo subjekti të thjeshtë, një mesazh metafizik."

Luljeta Lleshanaku

Fragmente nga libri

Akuilonet

Fëmijët rrijnë te bari
akuilonet e tyre të lehtë e me ngjyra
rrinë pezull lart.
Ndër të gjelbrit e të kaltërtit
rrinë pezull.
Fëmijët rrinë anë bregut
akuilonet e tyre lart fluturojnë
ndër ar e të kaltër
fluturojnë.

Unë vëreja femijët e gëzuar
e vëreja akuilonet
të lartësoheshin të hirshëm e të lehtë.
Ndër mijëra lëvizje rrëzëlluese
me sy të hutuar
ndjekja fluturimet e tyre.

Deja t'isha unë një akuilon
ndër të gjelbrit e të kaltërtit të fluturoja
ndër të artit e të kaltërtit të fluturoja!

Një dritare e rrumbullakët

Në vëren mirë tek u
si nga një dritare e rrumbullakët
mbi zëmrën time
mund të shohësh të lundrojën me vela
ëndërrat time të bukura
ato që kam realizuar,
ato fantastike
të cilavet nuk di më t'i jap emrin,
ato që kërkoja të zëja
e që u zborën,
ato që besoja se i kisha zënë
e pran thyheshin.
Në vëren mirë nga ajo dritare e rrumbullakët
mund të shohësh të shkojën
ëndërrat time të bukura
e të njohësh ndëvonë
shpirtin tim!

Tek ajo natë

Tek ajo natë
embrioni i vogël
nga djeba e barkut tim
u këput
me një dridhje të lehtë:
nga gjella iku e nga imja.
Vetëm më la
ndërsa unë pa dijtur
adhà e dashuroja.
Ende ë në veten time kujtimi i tij,
i gjallë.

Mbi autoren

Marg Shilipa (Margarita Shilipa) lindi në Palermo nga prindër të Horës së Arbëreshëvet. U diplomua në Institutin Pedagogjik e mësoi për disa vjet në krahinën e Torinos e të Hora e Arbëreshëvet. Poezi të saj janë botuar në revistat arbëreshe me pseudonimin Mitja o Marg.