Titulli: Historia e Francës, nga zanafilla deri në ditët tona
Origjinali: Histoire de la France
Gjinia: Histori
Autori: Georges Duby
Shqipëroi: Asti Papa, Nasi Lera, Sokol Haxhimusai, Ardian Vehbiu
Shtëpia botuese: Dituria
Viti: 2012
Fq. 1176
Pesha: 1.78 kg
ISBN: 978-9928-103-46-8
Koment nga autori
Në kujtesën tonë kolektive historia e Francës na duket si një vijimësi ngjarjesh, gërshetimi i të cilave gjatë kohës bëhet gjithnjë edhe më pak i ndërprerë, gjithnjë edhe më i ngjeshur dhe i koklavitur. Pikërisht për këtë arsye edhe faqet e këtij libri janë të ngarkuara me mjaft data, në mënyrë që të vendosen në çastet e përpikta disa ngjarje politike ose ushtarake, si dhe gjithashtu që të dallohen kalimet ndërmjet ndarjeve të veprës.
Megjithatë është e qartë se betejat ose kryengritjet, krizat dinastike ose vendimet e pushtetit, përgjithësisht mund të quhen si shqetësime në sipërfaqe, ndërsa shtysat e thella të historisë janë gjetiu, janë në rregullimin e forcave prodhuese, në mënyrën me të cilën ishin shpërndarë midis njerëzve, nga një periudhë në tjetrën, fuqia dhe pasuritë. Rrjedhimisht autorët i kanë kushtuar vëmendjen më të madhe strukturave politike, shoqërore, ekonomike dhe demografike.
Ata kanë dashur që të shquajnë ndryshesat, e ngadalshme ose të menjëhershme, të cilat i kanë prekur ato. Veç, kësaj na duket e nevojshme që t'i hapim gjerësisht perspektivat e dy fushave me të cilat po merren kohët e fundit kërkimet historike.
Ndërkohë që në Francë po përparon arkeologjia e ekzistencës së përditshme dhe qasja ndaj antropologjisë të së kaluarës, ndërkohë që po përpiqemi që të përcaktojmë shprehitë mendore dhe mënyrat e sjelljes, po mundohemi që të lidhim, sa më ngushtë që të jetë e mundur, historinë e ngjarjeve dhe të strukturave ekonomike e shoqërore me atë të mënyrave të të jetuarit, të punuarit, të vendosjes në gjirin e mjedisit natyror, por edhe të besimeve, të sharteve fetare, të pikëpamjeve, si dhe me atë të krijimtarisë artistike e letrare, atë të edukimit, të moralit, të mendimit dhe të përparimit shkencor.
Si përfundim ky libër është me të vërtetë një histori e tërësisë së qytetërimit në ato vende, të cilat përbëjnë sot Francën.
Mbi librin
Rezultat i një angazhimi të përbashkët të specialistëve më të mirë te epokave të ndryshme, bashkërenduar nga George Duby, një nga historianët më të mëdhenj francezë të shekullit XX, kjo Histori e Francës përfshin harkun kohor nga zanafilla në ditët tona. Vepra është një rrugëtim mes ngjarjesh, që merr në konsideratë jo vetëm strukturat politike, shoqërore, ekonomike dhe demografike, por edhe botëkuptimet, sjelljet dhe qëndrimet shoqërore.
Kjo metodë mundëson ndërtimin e një tabloje të hollësishme dhe koherente që ndriçon lidhjen e ngushtë mes ngjarjeve të mëdha dhe përditshmërisë, në perspektivën e një historie të plotë oú tout se tient: mënyra jetese dhe të prodhimit, besime dhe praktika fetare, krijime artistike dhe letrare, ideologji, mendim filozofik dhe progres shkencor.
Kësisoj kemi përpara një studim origjinal të plotë e shumëplanësh në veçanësinë dhe në marrëdhëniet e tyre reciproke brenda një kombi.
Mbi autorin
George Duby (1919 – 1996), titullar i hershëm i katedrës së historisë së shoqërive mesjetare në Collège de France dhe anëtar i Akademisë Franceze, konsiderohet si një nga historianët më me influencë të Mesjetës, periudhë së cilës i ka kushtuar një varg veprash. Një pjesë e tyre u shkruan edhe për publikun e gjerë, duke e bërë kështu historinë më të gjallë dhe joshëse për lexuesin.
