Titulli: Pasuria e Kombeve
Origjinali: Wealth of Nations
Gjinia: Ekonomi
Autori: Adam Smith
Shqipëroi: Gjergj Peçi
Shtëpia botuese: IPLS&DITA 2000
Fq. 288
Pesha: 0.35 kg
Mbi librin
Ky është ndoshta traktati politik dhe filozofik më me ndikim në dy shekujt e fundit. "Pasuria e Kombeve, një hetim mbi natyrën dhe shkaqet", u publikua në 9 mars 1776 dhe qe produkt i iluminizmit Skocez. Ai është një libër i vlefshëm për këdo mes njerëzve të ditur. Pavarësisht se konsiderohet si teori ekonomike, ky është një traktat politik pasojat e së cilit ende magjepsin dhe irritojnë njerëz në të katër anët e botës.
Teoria kryesore e librit, mosndërhyrja e shtetit në ekonomi, është e njohur tashmë nga të gjithë, por kjo është një pjesë e vockël e kësaj vepre monumentale, e cila arrin t'i japë lexuesit një panoramë të gjerë mbi kushtet kryesore të pasurimit të popujve, të avantazheve të detit në zhvillimin ekonomik e tregtar, pra është një libër që nuk duhet të lihet pa u lexuar.
Vepra "Pasuria e Kombeve" e Adam Smith-it mund të vlerësohet si një nga shtyllat e mendimit politiko-ekonomik. Me këtë vepër Adam Smithi u rrek të përvijojë një tablo të marrëdhënieve politiko-ekonomike dhe të analizojë se si zhvillohet ekonomia pa ndikimin e shtetit. Kësisoj ai e pasuroi me pikëpamje të reja traditën e mendimit etik dhe traditën e së drejtës natyrore.
Për librin e tij, Smithi përdori dorëshkrimet e leksioneve të mbajtura në universitetin e Glasgow-t dhe njohuritë (e tërthorta)të jetës ekonomike të Londrës dhe të Glasgow-t të asaj kohe. Çështja kryesore është se si arrijnë individi dhe shoqëria të sigurojnë nevojat,por edhe tepricat për të jetuar. Smithi sheh një marrëdhënie dallimi midis interesit të individit dhe të interesit të shoqërisë,dhe vë re se mbajtja e individit në brendësi të një bashkësie sigurohet nga mekanizmat e këmbimit:këmbimi lejon lojën e përbashkët të kërkesës dhe ofertës.
Përshkrimi që ai u bën mekanizmave të tregut është me vlerë edhe sot.Vepra "Pasuria e Kombeve" ndahet në pesë libra. Libri i parë: shkaqe që përmirësojnë aftësinë prodhuese të punës dhe rregulli sipas të cilit prodhimi i saj shpërndahet natyrshëm midis klasave të ndryshme shoqërore; Libri i dytë: natyra,grumbullimi dhe përdorimi i kapitalit; Libri i tretë: zhvillimi in ndryshëm drejt pasurisë në kombe të ndryshme; Libri i katërt: sistemet e ekonomisë politike; Libri i pestë: të ardhurat e sovranit apo të republikës.
