E zeza dhe e kuqja, Mehmet Kraja

Titulli: E zeza dhe e kuqja (kopertina e trashë)
Origjinali: E zeza dhe e kuqja
Gjinia: Roman
Autori: Mehmet Kraja
Shtëpia botuese: Onufri
Viti: 2015
Fq. 464
Pesha: 1.098 kg.
ISBN: 978-9928-186-75-1

Komente mbi autorin

"Në rrjedhën e dekonstruksionit të historisë, Kraja veçon dhe artikulon botën e individit, i cili as nuk e nxit dhe as nuk merr pjesë në drejtimin e rrjedhave, përkatësisht individin që është objekt i rrjedhave, i papeshë, anonim.

Në kuadër të këtij mozaiku, detaji merr peshë të veçantë, sidomos detaji i zgjedhur, i vërejtur me origjinalitet, mprehtësi dhe inteligjencë, detaji që të përkujton narracionin neorealist. Tregimtari, me këtë rast, lëviz çlirshëm dhe me shkathtësi brenda hapësirës dhe kohës së paracaktuar (...).

Mehmet Kraja, tani si një ndër mjeshtërit e shquar të krijimtarisë narrative – zhanrit romanor, me lehtësi ia nënshtron poetikës së vet gjithë laramaninë proceduese narrative, tërë ngarkesën historike, përçudnimin kohor, perspektivat përshkruese, pra, tërë korpusin stilor tregimtar që, sipas parimit poetik, i bluan natyrshëm në mullirin e vet, duke krijuar tërësi harmonike."

Ali Aliu

"Mehmet Kraja, në radhë të parë, është prozator i leteralitetit të dhuntishëm, atij të lindurit, genuin – it. Prandaj nuk është e rastit që, duke pasur vetëmjaftueshmërinë e zhvillimit, ka ardhur duke e pasuruar romanin shqiptar jo në statistikë, por atje ku sot është balli më cilësor i këtij zhanri.

Kraja është shkrimtar plot kërkime, vëzhgime inteligjente dhe qortime të hidhura përballë ndërgjegjes kombëtare. Eseist në letërsi. Analist në politikë. I flaktë në publicistikë. Ai është vërtet mizor dhe i pamëshirshëm nganjëherë. Por i pamëshirshëm sidomos ndaj vetes, sepse marazi kundër konformizmit dhe nervi i mospajtimit me padrejtësitë s'e lejojnë të përdorë për gojën shtupën e heshtjes.

Në pasurinë, lirinë dhe elegancën e përdorimit, Kraja është një nga kampionët e gjuhës letrare. Në të gjithë historinë e letrave tona, prej fillimit e deri më sot, haset rrallë ndonjë shkrimtar që ekspresionizmin e mjedisit dhe natyrës ta ketë në nivelin e këtij autori."

Zija Çela

"Pjesa më e madhe e prozës së Krajës është një kthim në histori. Kthimi nuk ka synim pohimin po ironizimin. Kjo është një nga parimet e poetikës postmoderne. Postmodernistët u kthehen epokave të mëdha jo për të dokumentuar po për t'i ironizuar.

Historia e Krajës nuk është histori e betejave apo e luftërave që fitohen, është histori e ndeshjes së ideve që ato luftëra kanë bartur. Historia është konstruksion ideologjik, përplasje civilizimesh, luftë e ashpër për dominim kulturor të perandorive apo të kanoneve religjioze andaj kthimi kah historia bëhet si ironi me qëllim relativizimi të tiranive totalitare të sistemeve grandioze që mbajnë frenat e së vërtetës historike si një pronës të paprekshme.

Autori shpesh ndërton histori duke kombinuar dijen me prekjen konkrete, atë që e zhvillon si pjesë e mbetur nga e kaluara me atë që e sheh sot me syrin empirik. Në udhëkryqet e perandorive, të doktrinave dhe në përplasjet e strategjive luftarake që kanë synim shtrirjet globale, prehen fatet e njerëzve, fatet e popujve të vegjël, rrafshohen kulturat e tyre dhe uniformohen diversitetet në emër të ideve të mëdha."

Basri Çapriqi

Mbi autorin

Mehmet Kraja ka lindur më 27 qershor 1952 në Kështenjë të Krajës, fshat afër Liqenit të Shkodrës, në Mal të Zi. Shkollimin e mesëm e kreu në Ulqin, ndërsa të lartin në Universitetin e Prishtinës, Dega e Gjuhës dhe Letërsisë Shqipe.

Gjatë viteve 1974 – 1976 ishte kryeredaktor i gazetës së studentëve të Universitetit të Prishtinës "Bota e re". Më pas punoi si gazetar dhe redaktor i kulturës në gazetën "Rilindja", ku botoi tekste të shumta publicistike për çështje të ndryshme nga problematika kulturore dhe recensione dhe shkrime diskursive për letërsinë.

Në fund të viteve tetëdhjetë dhe në fillim të viteve nëntëdhjetë u inkuadrua në lëvizjet politike të kohës duke u bërë njëri nga themeluesit e Lidhjes Demokratike të Kosovës. Gjatë viteve 1992 – 1999 jetoi dhe punoi në Tiranë. Gjatë kësaj kohe e pushoi angazhimin politik dhe iu përkushtua letërsisë dhe publicistikës.

Pas luftës së vitit 1999 u kthye në Kosovë, disa muaj ishte redaktor i kulturës në të përditshmen "Zëri", ndërsa në periudhën 2000 – 2005 ishte redaktor i shtojcës për kulturën në gazetën "Koha ditore". Që nga viti 2002 është edhe ligjërues në Fakultetin e Arteve në Prishtinë. Në vitin 2006 u zgjodh anëtar i Akademisë së Shkencave dhe Arteve të Kosovës.

Me shkrime letrare filloi të merrej që kur ishte nxënës i gjimnazit në Ulqin dhe tregimet e para i botoi në revistën letrare "Jeta e re". Deri më tani ka botuar njëmbëdhjetë romane, katër vëllime me tregime, dhjetë drama dhe katër libra me kritikë e publicistikë.