Titulli: Bulevardi i Pestë
Origjinali: One Fifth Avenue
Gjinia: Roman
Autori: Candace Bushnell
Shqipëroi: Margarita Sulaj Skënderi
Shtëpia botuese: Dudaj
Viti: 2013
Fq. 520
Pesha: 0.401 kg
ISBN: 978-99943-0-302-1
Mbi librin
Ndërtesa nr. 1 në Bulevardin e Pestë, një godinë e bukur ku spikat arti dekorativ dhe që lartësohet në lagjet e modës më të fundit, është një adresë e llojit të vetëm, nga ato ndërtesa ku, në një mënyrë apo në një tjetër, rrugën brenda saj duhet ta fitoni vetë.
Për gratë e romanit të ri dhe jashtëzakonisht të bukur të Candace Bushnell-it, Ndërtesa nr. 1 në Bulevardin e Pestë ndodhet në qendër të jetëve të tyre, që ato i kanë ngritur me aq kujdes apo që shpresojnë t'i ngrenë.
Kemi aty Shifer Dajmondin, një aktore dyzet e pak vjeçare, që dëshmon në mënyrë energjike se gratë me stil mbeten me të vërtetë gjithmonë të reja. Kemi Lolën e llastuar dhe me vetëbesim të madh, që është e vendosur ta fusë veten në shoqërinë e lartë dhe në krahët e burrit të duhur e që kapet me thonj e me dhëmbë pas asaj ndërtese.
Analiza është bashkëshortja e një menaxheri të lartë të një kompanie investimesh, si dhe një personalitet shoqëror disi ngurruese, ndërsa Mindi idhnakja është martuar me një shkrimtar jo shumë të botuar dhe ka qenë ajo shtylla e familjes për një kohë tepër, tepër të gjatë.
Është gjithashtu edhe Enida, zonja e madhe magjepsëse dhe gazetare thashethemesh, që ka jetuar në Pallatin nr. 1 të Bulevardit të Pestë për dekada të tëra dhe nga panorama që hapet prej apartamentit të saj në katet e sipërme sheh gjithçka që është për t'u parë.
I studiuar nga afër dhe me një mendjemprehtësi të pamëshirshme, "Bulevardi i Pestë" është një histori moderne e parellinjve të rinj e të vjetër, e politikave seksuale, vjedhjeve të pasurive të patundshme apo pasurive të fituara dhe të humbura brenda ditës. Një libër i shkëlqyer dhe origjinal, që tregon se askush nuk mund ta paraqesë Nju-Jorkun ashtu si Candace Bushnell.
Komente mbi librin
"Përfytyroni Xhejn Austinin me një martini ose ndoshta Xhonatan Suiftin me një palë patina."
Sunday Telegraph
"Mbetet sërish mbretëresha e filozofëve të skenës sociale."
New York Times Book Reviw
Mbi autoren
Candace Bushnell është autorja që ka tërhequr vëmendjen e kritikës letrare për librat e saj bestseller "Seksi dhe qyteti", "Katër biondet", "Tregtia" dhe "Xhungël buzëkuqesh". Libri i saj i parë, "Seksi dhe qyteti", shërbeu si bazë për serialin e suksesshëm televiziv dhe filmin me të njëjtin titull që zuri majat e klasifikimit për nga shitja e biletave.
Libri i saj i katërt, "Xhungël buzëkuqesh", është bërë një film-dramë, i transmetuar nga televizioni NBC. Bushnell është gjithashtu prezantuese e programit radiofonik "Seksi, arsyeja dhe ndjeshmëria", që transmetohet drejtpërsëdrejti në Sirius Stars. Ajo jeton në qytetin e Nju-Jorkut.
