Titulli: Gjysmëvëllai
Origjinali: Halvbroren
Gjinia: Roman
Autori: Lars Saabye Christensen
Shqipëroi: Nazmi Xhomara
Shtëpia botuese: Dituria
Viti: 2015
Fq. 792
Pesha: 0.854 kg.
ISBN: 978-99927-59-16-X
Mbi librin
Gjysmëvëllai është një kryevepër brilante. Jeta e katër brezave të një familjeje të rëndomtë në Oslo, figura e Fredit, boksierit, ngjizur pas një përdhunimi të së ëmës në papafingon e shtëpisë dhe e vëllait të tij më të vogël, Barnumit, që do të bëhet më pas një skenarist i njohur i kinemasë norvegjeze, janë emocionues dhe me një forcë ngazëllimtare.
Fragment nga libri
Është e enjte, 8 maj 1945 dhe Vera, mamaja jonë, është lart në papafingo, në Rrugën e Kishës, duke hequr nga kapëset rrobat që janë tharë e zbutur atje gjatë natës. Ajo qesh me vete, ndërsa zgjatet te litari i lirshëm i rrobave, që është i ashpër në gishtërinjtë e saj dhe mund të këputet me lehtësi, në qoftë se ajo nuk tregon kujdes.
Është Vera, mamaja jonë, që qëndron kështu, e vetme në papafingo; ajo qesh dhe lëshon kapëset prej druri në xhepin e gjerë të përparëses dhe i vendos me kujdes njërën pas tjetrës rrobat në kanistrën pranë saj.
Ndihet ngrohtë dhe nuk mendon për asgjë; ajo është thjesht plot e përplot me një gëzim të madh e të çuditshëm, diçka që nuk e ka provuar kurrë më parë. Sepse ndihet si tjetër tani. për pesë vjet ka pasur luftë dhe në verë ajo do të bëhet njëzet vjeç, dhe tani, pikërisht tani, po fillon jeta e saj...
Komente mbi librin
"Një përzierje mahnitëse e tragjedisë dhe e komedisë, me një tis të hollë fantastik në një pendë realiste deri në përkorje, kjo është drama e këtij libri ambicioz, që fillon në ditën e fitores pas Luftës së Dytë Botërore."
The Bookseller
"Sensacioni dhe bestselleri i letërsisë norvegjeze. Do të kalojë një kohë fort e gjatë para se ju të lexoni një gjë tjetër dhe të jeni i çliruar nga tingëllimi i Christensen – it."
Morgenposten
"Gjysmëvëllai është një tjetër shembull shumë interesant i letërsisë bashkëkohore skandinave; vepër thellësisht e ndjerë, e punuar në detaje, intelektualisht kërkuese dhe një libër me rëndësi ndërkombëtare."
The Guardian
"Një roman sfidues dhe mrekullisht i pasur, që ka ecur në historinë europiane, i ngarkuar me shqetësimet e ditëve të sotme."
The Publishers Weekly
Mbi autorin
Lars Saabye Christensen është shkrimtar bashkëkohor norvegjez shumë i shquar. Studimet universitare i ka kryer për letërsi dhe gjuhë norvegjeze, histori arti dhe histori të ideve. Është autor i dymbëdhjetë romaneve, si dhe i shumë tregimeve dhe poezive. Mes veprave të tij më të shquara përmendim: Bitëllsat (1984), për të cilin mori Çmimin Cappelen, dhe veçanërisht romanin me sukses ndërkombëtar Gjysmëvëllai (DITURIA, 2003).
Ky roman që është botuar në më shumë se 30 gjuhë, ka fituar Çmimin Nordik për Letërsinë, si dhe Norwegian Booksellers Prize, është përfshirë në listën përfundimtare për The 2005 International IMPAC Dublin Literary Award dhe në atë të kandidatëve për The Independent Foreign Fiction Prize, si dhe është përzgjedhur si një nga 25 titujt e shquar të vitit 2004 nga American Librar y Association.
Më 24 tetor 2006, Lars Saabye Christensen u emërua Komandant i Urdhrit Mbretëror Norvegjez të Shën Olavit, kurse në prill 2008, qeveria franceze e nderoi me titullin Kalorës i Urdhrit të Arteve dhe Letërsisë. Lars Christensen është edhe anëtar i Akademisë së Gjuhës dhe Letërsisë të Norvegjisë.
