Titulli: Tinguj dhe plumba
Origjinali: Il colore del melograno
Gjinia: Roman
Autori: Giuseppe Scelsi
Shqipëroi: Matilda Mali
Shtëpia botuese: Toena
Viti: 2010
Fq. 168
Pesha: 0.19 kg
ISBN: 978-99943-1-668-7
Mbi librin
Kur muri i fortë i ideologjive thyhet e bëhet copa, mijëra shqiptarë bien në një dëshpërim të thellë. Sistemi shkërmoqet, idetë dhe ndjenjat tronditen, ndërsa ngurtësia e një regjimi me dhjetëra vite i mbyllur në vetvete shpie në egërsimin e njerëzve.
Edhe Filip Galimuna, një rreshter i ushtrisë shqiptare i apasionuar pas pianos, krejt njëherësh humbet gjithçka dhe mbetet në krye të një kazerme të boshatisur; i braktisur nga të gjithë, pasi njerëzit kanë parapëlqyer vegimin e arratisë drejt Italisë. E shoqja, Iliria, jo vetëm që nuk i jep mbështetjen për të cilën ai ka nevojë, por e lë dhe dashurohet me një burrë, i cili ka bërë përpara me trafiqe.
I kapur nga një dëshpërim i madh, Filipi përfshihet në trafikimin e armëve, fitimet e të cilit përfundojnë në duar të gabuara, duke i hequr edhe shpresat dhe iluzionet e fundit. Ngjarjet kanë një përfundim dramatik, por jo të papritur. Kur Galimuna ia mbath drejt Italisë, bashkë me të shoqen dhe djalin e vogël, aty e pret Aturo Mondeli, një koleg muzikant.
Ky, pasi e ndjen gjenialitetin artistik të rreshterit, i jep zemër të vazhdojë mësimet e pianos dhe e shpie drejt suksesit në veprimtaritë më të mëdha ndërkombëtare. Megjithatë, kur rasti i jep mundësinë të hakmerret për vdekjen e djalit të madh, sërish edhe një herë del fuqishëm thirrja e miteve të vjetra. Por kësaj radhe diçka ka ndryshuar.
Mbi autorin
Xhuzepe Shelsi, prej tridhjetë vjetësh është jurist, gjykatës dhe së fundmi prokuror. Është marrë me raste krimesh, vrasjesh, korrupsioni dhe me krimin e organizuar. Në romanin "Tinguj dhe plumba", që është edhe i pari i tij, ka dashur t'u japë formë dhe fjalë ndjenjave të cilat gjatë rrugëtimit të tij profesional kanë mbetur të pashprehura.
