Titulli: Pacientja "101"
Origjinali: Pacientja "101"
Gjinia: Tregime
Autori: Nimfa Hakani
Shtëpia botuese: Toena
Viti: 2015
Fq. 320
Pesha: 0.401 kg.
ISBN: 978-9928-205-02-5
Mbi librin
Nëpër faqet e këtij libri, do t'ju kristalizohen para syve karaktere grash që pësojnë trauma të paimagjinueshme si femra gjatë jetës së tyre qoftë nga meshkuj agresivë jashtë familjes, por edhe nga anëtarë perversë të familjes, trauma për të cilat, ne si shoqëri e kemi nganjëherë të vështirë të flasim, duke ndjekur parimin se çfarë është fshehur pas dyerve në musëndër, duhet të mbetet në musëndër.
Ndodhi të tilla, ne i konsiderojmë të ndaluara si shoqëri sado të emancipuar që jemi, sepse nuk duam të pranojmë faktin që ato ekzistojnë, që ato ndodhin, dhe që shpesh na "frikësojnë" deri në tulatje apo edhe zemërim, duke shkaktuar si kundërveprim, miopi të vetinduktuar nga ana jonë, deri dhe në mohim të ekzistencës së tyre.
Për këtë arsye i shmangemi pranimit të rastisjes së tyre në botën ku jetojmë, apo reagojmë negativisht kur këto tema tabu bëhen publike, nganjëherë në kurriz të vetvetes, të atyre që na rrethojnë, apo shpesh edhe të njerëzve që ne as nuk i njohim, ndaj të cilëve, pa kuptuar, bëhemi gjykues tepër të rreptë deri edhe në ndëshkim verbal të padrejtë.
Çdo ngjarje e përshkruar nëpër tregime të ndryshme të këtij libri, që mund të krijojë përshtypjen sikur është e lidhur me ngjarje të vërteta është një rastësi e thjeshtë. Çdo tregim në këtë përmbledhje është një trillim i pastër i imagjinatës, i inspiruar nga shkëndija ngjarjesh jetësore.
Fragment nga libri
... "Çfarë ndodhi me ne?", pyeti veten. Ndjeu një si sëmbim në kraharor. U rregullua në karrige si për të gjetur një pozicion më të rehatshëm dhe për të larguar nga vetja atë të vërtetë të hidhur që i ishte shfaqur para sysh si dhe për t'iu shmangur përgjigjes së asaj pyetjeje. Për një çast të shkurtër pa veten në një shëmbëlltyrë ku e vërteta shpalosej lakuriq dhe e pamëshirshme. Nuk i pëlqeu se çfarë pa në atë vegim të shkurtër.
Një si gurgullimë iu ngrit diku në brendësi të qenies, një gurgullimë e dalë nga ai vegim i beftë dhe, si një shprehje e subkoshiencës së tij, pëshpëriti nëpërmjet një zëri akuzues: "Ju harruat vetveten! Harruat qëllimin përse ju ishit të revoltuar në rininë tuaj. U tjetërsuat ngadalë gjatë pesë dekadave në diçka që, dikur, vetë kishit përçmuar"...
Mbi autoren
Nimfa Hakani lindi në qytetin e Elbasanit në maj të vitit 1952. Në vitin 1975 u diplomua në Universitetin e Tiranës në Fakultetin e Inxhinierisë Elektrike. Gjatë viteve 1977-1993 punoi përkatësisht si inxhiniere elektrike dhe më vonë si mësuese e lëndëve teknike në shkolla të mesme të Tiranës.
Në vitin 1995 emigroi për në Amerikë bashkë me familjen e saj. Gjatë qëndrimit në shtetin e Nju-Jorkut përfundoi studimet pasuniversitare pranë "Mercy College"dhe zotëron diplomën Master Degree në "Science in Education" (Shkenca të Arsimit), si dhe licencën e shtetit të Nju-Jorkut për mësuesi në matematikë.
Ka punuar si mësuese e matematikës në sistemin publik të qytetit të Nju-Jorkut për 15 vjet. Aktualisht ka dalë në pension. Ka dy fëmijë të rritur dhe është gjyshe e tri mbesave dhe një nipi. Pas daljes në pension i është kushtuar krejtësisht të shkruarit, duke prekur zhanre të ndryshme, si: poezi, tregime, artikuj opinionistë për gazeta të ndryshme të internetit. Pasionin për të shkruar poezi e prozë e ka pasur që në moshën e adoleshencës.
