Titulli: Zonja me të kuqe
Origjinali: Zonja me të kuqe
Gjinia: Roman
Autori: Majlinda Nana Rama
Shtëpia botuese: Toena
Viti: 2015
Fq. 184
Pesha: 0.215 kg.
ISBN: 978-9928-205-21-6
Mbi librin
Jasmina e romanit "Zonja me të kuqe" është rasti më flagrant i fatit të nëpërkëmbur të një gruaje, e cila nuk shihet përtej pamjes së leckosur. Për këdo ajo mund të jetë një lypëse, një varfanjake dhe as më shumë e as më pak sesa një e çmendur.
Por, në gjithë këtë zallamahi etjesh për të poshtëruar një qenie të pambrojtur, shfaqet një burrë, një njeri që merr përmasat e mbi Himalajeve, që kapërcen telin me gjemba të paragjykimit të thellë shoqëror dhe depërton në thellësi të kësaj krijese.
Ai i zbulon gurë më gurë, thesaret e një bote pa mbarim... dhe imagjinoni... të botës së flakur tej, të botës së lënë në rrugë, të botës së vrarë çdo ditë, të botës pa ëndrra. Ky është superburri, një kryeprokuror që i dëshmon botës mbarë se vlerat ndër burra ekzistojnë...
Një romancë dashurie në përmasa të ethshme mes Jasminës dhe Iliazit e sjellë, në këtë roman racën njerëzore në dimensione të tjera, me vlera dhe jovlera, që ka një start dualiteti zemër-arsye, por që prodhon drama dhe jo vetëm...
Fragment nga libri
Kishin kaluar njëzet ditë pa një vizitë nga Iliazi. Jasmina mendonte se ai kishte bërë zgjedhjen e tij. Ishte e frikshme të mendonte të ecte pa Iliazin, por donte t'ia dilte vetë. Nuk e bënte fajtor për mungesat. E dinte që ai kishte një grua që e priste.
Jasmina kish hyrë mes tyre. Ky justifikim për Iliazin, ia bënte më të lehtë kapërcimin e situatës. Vendosi të ikte edhe nga ky qytet. Këtë herë nuk dinte si do t'ia bënte, por vendosi që të ikte. Iliazi do të mbetej për të burri i ëndrrave të realizuara. I vetmi mbi tokë që e bëri grua.
Tani, më shumë se kurrë, Jasminës i erdhën në mendje fjalët e letrës së nënës, ku i kërkonte të ecte përpara me kokën lart. I bëri gati valixhet qysh në mbrëmje. Të nesërmen do të nisej me tren për në Trevana, një qytet që kish dashur ta njihte qysh e vogël.
Me vete mori edhe ca para, të cilat, qysh sa kishte nisur të jetonte me Iliazin, nuk i mungonin asnjëherë. Kur ishte duke vendosur teshat në valixhe, poshtë banesës (ku jetonte prej gati tre muajsh), dëgjoi një zhurmë automjeti dhe pas saj të bërtitura njerëzish.
Rreth autores
Majlinda Nana Rama lindi në Tepelenë, më 27 maj 1980. Në vendlindje mori mësimet e para e ato të mesme. Gjatë viteve 1998-2002 kreu studimet e larta për gjuhë shqipe dhe letërsi dhe më pas, në vitet 2009-2012 kreu Fakultetin e Shkencave Politike, në degën marrëdhënie ndërkombëtare. Më vonë përfundoi studimet Master Shkencor për shkenca politike dhe juridike.
Ka punuar si administratore e Shërbimit Social Shtetëror dhe më pas si mësuese e gjuhës shqipe dhe letërsisë. Prej vitit 2004 dhe aktualisht jep kontributin e vet në mediet pamore dhe ato të shkruara, ku evidentohet puna disavjeçare si drejtore informacioni në TV rajonal "Apollon", Fier.
Ka punuar si gazetare e TV "Ora News", Tiranë. Nga viti 2006 dhe aktualisht punon si gazetare e gazetës "Panorama", Tiranë. Është themeluese dhe botuese e gazetës "Ora juaj". Është autore, skenariste dhe drejtuese e qindra emisioneve sociale, kulturore dhe politike. Nga viti 2011 punon në bashkinë e Fierit. Është Presidente e Fondacionit Kulturor "HARPA".
