Titulli: Gjenerali i ushtrisë së vdekur (kopertinë e trashë)
Origjinali: Gjenerali i ushtrisë së vdekur
Gjinia: Roman
Autori: Ismail Kadare
Shtëpia botuese: Koha Ditore
Viti: 2005
Fq. 222
Pesha: 0.311 kg
ISBN: 84-9819-046-0
Mbi librin
Një gjeneral dhe një prift italian, pas përfundimit të Luftës së Dytë Botërore, shkojnë "në vendin e bijve të shqipes". Misioni i tyre është i pazakonshëm, i vështirë dhe grotesk: ata kërkojnë eshtrat e bashkëkombësve të rënë në luftë dhe kthimin e tyre në atdhe.
Përpjekjet e tyre nuk i pengojnë vetëm balta, acari dhe shiu. Në udhëtimin e tyre ata përballen me fate dhe fatkeqësi, biografi të çuditshme dhe pamje të llahtarshme.
Koment nga Stephan Wackwitz
"Gjenerali i ushtrisë së vdekur" i Ismail Kadare është një "përmbledhje përrallore, njëkohësisht fëminore, e vjetër dhe e goditur, që shpalos një ngjarje, të cilën vetë libri me jodisiplinë të përsosur artistike e ka derdhur në toposin sugjestiv, fantastik, frikëndjellës dhe erotik të një romantike ferri.
Sepse në këtë roman që habitshëm sillet në vetvete, që fillon vazhdimisht rishtazi dhe që modifikon motivet vërtet është fjala për zhgroposjen, katalogjizimin, kthimin në shtëpi të një armate pushtuese. Toka e Shqipërisë duhet t'i kthejë kufomat e armiqve të dikurshëm në mënyrë që ata të varrosen në vendlindjen e tyre matanë detit."
Fragment nga libri
Ishte njëherë një gjeneral dhe një prift që kishin dalë për kësmet. Jo, nuk kishin dalë për kësmet. Ata kishin dalë për të mbledhur eshtrat e ushtarëve të tyre të vrarë në një luftë të madhe. Ec e ec, kapërcyen shumë male e shumë fusha, duke kërkuar e duke mbledhur këto eshtra.
Vendi ishte i ashpër e i keq. Frynin erëra e binin shira pa pushim. Por ata nuk u kthyen nga udha dhe ikën më tutje. Mblodhën sa mblodhën dhe u kthyen të numëronin ato që kishin mbledhur. Doli se mungonin ende shumë eshtra.
Atëherë mbathën opingat e veshën zhgunet dhe u nisën prapë për udhë. Ec e ec, kapërcyen shumë male e shumë pllaja. Moti ishte i egër e i keq. U lodhën e u këputën e u plasi shpirtin kjo punë. As era, as dëbora nuk u tregonin ku gjendeshin ushtarët që kërkonin.
Mblodhën sa mblodhën dhe u kthyen prapë të njehsonin ato që kishin mbledhur. I njehsuan dhe doli që kishin mbetur pa gjetur ende shumë ushtarë. Atëherë, të lodhur e të rraskapitur, u nisën prapë për udhë të madhe. Ec e ec e udha s'kishte të sosur. Ishte dimër, binte borë.
Mbi autorin
Ismail Kadare u lind në vitin 1936 në Gjirokastër. Ka studiuar në Tiranë dhe në institutin "Gorki" në Moskë. Deri në vitin 1990 ka jetuar në Tiranë. Jashtë kufijve të Shqipërisë, Kadare u bë i njohur me romanin "Gjenerali i ushtrisë së vdekur", i cili në Francë është xhiruar si film nga Marcello Mastroianni dhe Michel Piccoli. Për veprën e tij, Ismail Kadare është shpërblyer me çmime të rëndësishme letrare dhe është anëtar i shumë akademive.
Po ashtu, Kadare është oficer i Legjionit të Nderit të Francës. Prej shumë vitesh konsiderohet si njëri prej kandidatëve kryesorë për çmimin "Nobel" për letërsi. Romanet e tij janë përkthyer në 30 gjuhë. Aktualisht Kadare jeton në Tiranë dhe në Paris.
