Titulli: Një sagë e vogël
Gjinia: Roman
Autori: Besnik Mustafaj
Shtëpia botuese: Toena
Viti: 2017
Fq. 280
Pesha: 0.301 kg.
ISBN: 978-9928-235-58-9
Mbi librin
Ky libër, më shumë se një roman, është një përrallë e hidhur, me raste të përsëritura burlesku. Burgu, një institucion i paturpshëm i pushtetit totalitar, është konstantja e pakthyeshme në historinë e një vendi që mund të quhej Shqipëri, por shumë mirë mund të quhej edhe Serbi, Maqedoni ose Kosovë - emri nuk përmendet.
Në tre brezat e dy familjeve gjithçka vërtitet rreth një burgu: në të shkuarën, në të tashmen dhe në të ardhmen, burgu i vendit të errët të përrallës i ndan njerëzit në dy kampe, atë të rojtarëve dhe atë të të ruajturve.
Njërin nga tre librat "Një sagë e vogël", Besnik Mustafaj ia kushton heroit të guximshëm popullor, Oso Hutës, "i cili ndeshej me xhandarët e mbretit", një kaçak ballkanik me një dragua në gjoks. Atë e katandis burgu në një hero gri me dhëmbë të rënë, zemërimi i të cilit mezi arrin të shkulë sumbullat e xhaketës së të burgosurit.
Fragment nga Libri
Më kishte vëzhguar me syrin e saj prej gruaje që më donte. Kjo edhe njëherë ishte prova më e fortë e dashurisë së saj për mua. Nuk mund të ketë shpërblim më të lartë për një burrë të dashuruar.
Linda vetëm me të nuhatur e kishte kuptuar më mirë se unë vetëndikimin shpërfytyrues që kishte pasur tek unë jetesa e gjatë në një mjedis i gjithi mashkullor. Të jetuarit me detyrim vetëm midis burrave çon, pashmangërisht, në prishjen e njërit nga ekuilibrat më të rëndësishëm të natyrës.
Mua, ndër të tjera, duke m'u shtyrë deri në skajmëri ndrojtja, në fund të fundit më ishte vrarë në një masë të madhe guximi për ta kërkuar kënaqësinë e jetës siç më takonte. Gjithë dështimi i asaj nate ishte vetëm një shembull i vogël. Pas humbjes së një guximi të tillë, vjen si një ngushëllim i vetvetishëm humbja e vetë shijes së jetës.
Më saktë, krijohet pa u ndier një shije tjetër, e cila banalizon krimin. Pa hyrë në arsyetime të stërholluara, që nuk janë as në natyrën time, do të thosha se diktaturat vijnë nga pak edhe si pasojë e një krize të thellë, por të paidentifikuar, së paku jo të pohueshme, që përjeton pjesa mashkullore e kombit.
Mbi autorin
Besnik Mustafaj lindi në qytetin e Bajram Currit, më 1958. Kreu studimet e larta për gjuhë dhe letërsi frënge në Fakultetin e Gjuhëve të Huaja të Universitetit të Tiranës, më 1982.
Nga viti 1992-1997 shërbeu si ambasador i Shqipërisë në Francë, ndërsa në vjeshtë të vitit 2005 u emërua ministër i Punëve të Jashtme të Shqipërisë.
Prej disa kohësh ai ka hequr dorë nga politika dhe i është përkushtuar tërësisht krijimtarisë letrare. Vepra e tij letrare përfshin poezi, tregime, proza për fëmijë, ese, skenarë filmash, romane dhe përkthime.
Besnik Mustafaj është vlerësuar nga kritika shqiptare dhe e huaj si një nga autorët më përfaqësues të letërsisë moderne shqipe. Botimet Toena gëzon të drejtën e paraqitjes të të gjithë veprës së tij në shqip dhe po punon për rikthimin në vëmendjen e lexuesit të librave të tij që mungonin prej kohësh nëpër librari.
Në katalogun tonë kanë zënë vend esetë e tij politike "Midis krimeve dhe mirazheve" dhe "Bishti i Kometës"; ditari diplomatik "Fletorja rezervat", përmbledhja e përkthyer me poezi të zgjedhura nga Nazmi Hikmet "Barra e shenjtë", si dhe romanet "Boshi" dhe "Daullja prej letre". Më 2013 botoi romanin "Autoportret me teleskop", që u vlerësua me çmimin "Libri artistik i vitit" nga Akademia "Kult".
