Kohe per askund, Arben Shehi

Titulli: Kohë për askund (kopertinë e trashë)
Origjinali: Kohë për askund
Gjinia: Poezi
Autori: Arben Shehi
Shtëpia botuese: Onufri
Viti: 2009
Fq. 120
Pesha: 0.344 kg
ISBN: 978-99943-42-33-4

Koment nga Arben Iliazi

Duke hedhur këto shënime kam menduar se nëse shprehja e njohur "poezia sidoqoftë është një pasqyrë e vogël e vetë poetit" ka pjesë të së vërtetës, kjo është padyshim e vërtetë edhe për Arben Shehin. Një poezi thellësisht lirike e plot kontraste, një pasqyrim i plotë i lirisë, si dimensioni i tij më i qenësishëm.

Krenar deri në skajshmëri dhe njëherësh modest, i përmbajtur dhe impulsiv, mik ekstremisht bujar por edhe mermer i ftohtë, mirënjohës i lindur por edhe harresëhedhës i madh, fin deri në detajet më të vogla dhe gjithashtu gati harrakat, mondan tradite por befasisht i thjeshtë deri në lodhje, stoik i lindur po sakaq i gatshëm të përlotet si fëmijë..., mbase këto janë tiparet më të spikatura plot kontraste e kundërshti të karakterit të tij, që sigurisht i janë skalitur në të gjithë krijimtarinë në vite.

Fragment nga libri

Kohë për askund

Varka të vjetra të skuqura nga ndryshku.
S'ka direkë, s'ka detarë, s'ka busull.
Ecin kuturu me detin e errët.
Pa drita, pa fenerë.

Mespërmes sopata vetëtimash,
Që çajnë dhe e lenë sërisht mbi det
Gjysmë të vdekur terrin.
Ikin, rrotullohen, ikin...Ikin për askund.

Në bregun përballë
Gjithnjë vazhdojnë të largohen emigrantët,
Kurvat e lodhura,Detarët me rrjetat që s'u mbushën kurrë...
Kjo kohë nuk të çon askund.
Në askund nuk mund ta çosh këtë kohë.

Mbi autorin

Arben Shehi u lind në qytetin e Shkodrës në vitin 1954, në një prej familjeve më të vjetra e më në zë të qytetit, me tradita të spikatura historike, intelektuale dhe shoqërore. Pas diplomimit për arkitekturë më 1977, për një kohë relativisht të gjatë i kushtohet projektimit arkitektonik dhe kërkimit shkencor të fushës (1979 – 1993), si dhe angazhimit akademik (lektor korrespondent) në Fakultetin e Arkitekturës (1984 – 1993).

Është po kështu i spikatur angazhimi i tij në jetën publike, në një numër artikujsh mbi arkitekturën, politikat ekonomike dhe të zhvillimit të qëndrueshëm në vijimësi. Zgjidhet Kryetar i Dhomës së Tregtisë së Shqipërisë (1994) dhe i Dhomës së Tregtisë e Industrisë Tiranë (1995 – 1999).

Më pas është nxitës e bashkëthemelues i disa organizatave jofitimprurëse të tematikave të reja në fushën e inovacionit të biznesit, sistemeve të cilësisë dhe të pronësisë intelektuale. Ndërkohë, letërsia dhe artet mbeten pasionet e tij të vazhdueshme.

Ka botuar librat me poezi "Pika e djersës", "Rikthimi drejt gjërave që i kam dashur" dhe "Gjysma e heshtjes", libra që karakterizohen nga lirizmi i thellë, ndjeshmëria dhe mirënjohja e veçantë për njeriun. Gjithashtu merr pjesë në disa ekspozita kombëtare të pikturës (1986 – 1990) dhe vetjake. Është zgjedhur në vazhdimësi anëtar i mjaft forumeve profesionale ndërkombëtare.