Aventurat e Tom Sojerit, Mark Tuen, pershtatje per femije

Titulli: Aventurat e Tom Sojerit (përshtatje për fëmijë)
Origjinali: Tom Sawyer
Gjinia: Roman
Autori: Mark Tuen
Shqipëroi: Kujtim Agalliu
Shtëpia botuese: Dy Lindje dhe Dy Perëndime
Viti: 2007
Fq. 152
Pesha: 0.191 kg
ISBN: 978-99956-06-08-4

Mbi librin

Në këtë libër bëhet fjalë për një djalë që është bërë i famshëm me aventurat e tij. Ai është Tom Sojeri. Në një nga eksursionet e shkollës, ata shkuan në një shpellë. Tom Sojeri dhe Beki humbën në atë shpellë. Në këtë rast Tom Sojeri kontrollon të gjitha labirintet e shpellës dhe e gjen daljen. Por edhe e sheh armikun e tij indianin Xhoa. Pas daljes nga shpella Tom Sojeri tregon për indianin Xhoa dhe ata e burgosin.

Fragment nga libri

E shkreta vajzë, as që e merrte me mend sa shpejt po i afrohej furtuna. Zoti Dobins, mësuesi, po kapërcente të dyzetat pa mundur të kënaqte një ambicie të tij. E kishte pasur dëshirën e dëshirave që të bëhej doktor, por vobektësia e detyroi të mbetej një mësues krahine. Ditë për ditë nxirrte që poshtë katedrës një libër misterioz dhe, kur asnjë nga klasa nuk duhej të lexonte me zë, humbiste në faqet e tij.

Librin e mbante të mbyllur me dry e me çelës. S'kishte kalama në shkollë që të mos digjej nga dëshira për t'ia hedhur njëherë sytë, por rasti nuk vinte kurrë. Beki, pra, po kalonte përbri katedrës, që ndodhej pranë derës, kur befas vuri re se çelësi ndodhej në dry! Rast që nuk vinte më. Vështroi njëherë rreth e rrotull dhe, si nuk vuri re asnjeri, nxori librin nga sirtari pa humbur kohë. Faqja e parë, me titullin e librit "Anatomia", dhe me emrin e autorit profesor Filan Fisteku, ishte për të si në arabisht, ndaj nisi të shfletonte.

I tërhoqi menjëherë vëmendjen një gravurë e bukur në faqen tjetër që paraqiste një njeri lakuriq. Befas mbi libër ra një hije në çastin që Tom Sojeri qëndroi te dera dhe i hodhi një sy ilustrimit. Beki u vërsul mbi libër që ta mbyllte menjëherë, mirëpo nga nxitimi e nga tersi, iu gris gjer në mes fleta e ilustruar. Ajo e futi librin në sirtar, e ktheu kyçin dhe gjithë turp e dëshpërim ia krisi të qarit.

-Tom Sojer, nuk ka njeri më të poshtër se ti që vjen këtu dhe fut hundët në gjërat që shikojnë të tjerët!-E nga ta dija unë ç'po bëje ti?-Të kesh turp nga vetja, Tom Sojer; unë e di që ti do të më spiunosh... Ç'të bëj tani, ku të futem unë e zeza? Do të më rrahin mua, që s'më kanë rrahur asnjëherë ne shkollë! Tomi mbeti pa fjalë, i hutuar nga ky sulm.

Pastaj foli me vete: -Thuaj pastaj që vajzat nuk janë biba! Nuk e paskan rrahur asnjëherë në shkollë! S'e sheh, punë e madhe e rrahura. Po gocat si gocat, delikate e zemërpula... E pse t'i tregoj unë atij plakushit Dobins, ka të tjera mënyra më pak të poshtra për t'i marrë hakun...

Mbi autorin

Mark Tuen është pseudonimi i shkrimtarit amerikan Samuel Langhorne Clemens. Para se të bëhej shkrimtar punonte si tipograf, si pilot, si kërkues ari dhe gazetar. Pas botimit të librit të tij: "Të pafajshëm në dhé të huaj" (1869), korri sukses të madh. Veprat e tij më të njohura janë: "Në kërkim të belave" (1872); "Mosha e artë" (1873); "Aventurat e Tom Sojerit" (1876); "Princi dhe i varfëri" (1882); "Një Janki nga Konektikati në oborrin e mbret Arturit (1889); "Uilsoni kokëtrashë" (1894).