Titulli: Lufta kundër pavarësimit të Shqipërisë
Origjinali: Lufta kundër pavarësimit të Shqipërisë
Gjinia: Histori, kujtime
Autori: Ismail Strazimiri
Shtëpia botuese: Naimi
Viti: 2010
Fq. 354
Pesha: 0.45 kg
ISBN: 978-9928-4017-1-7
Mbi librin
Libri i Ismail Strazimirit nuk është thjesht një libër kujtimesh. Në përmbajtjen e tij autori ka tejshkruar biseda shumë të rëndësishme me veprimtarë të kohës, vendës e të huaj, të zhvilluara nga ai vetë; letra të pritura e të dërguara; shenjime të rëndësishme për njohjen e procesit historik; informata dhe të dhëna që nuk gjenden në shkrimet teknokratike historiografike. Midis argumenteve themelorë ku shfaqet zbulimi i Ismail Strazimirit janë: përhapja e esadizmit nëpër Shqipëri; konflikti i anadollakëve me europeistët për qeverisjen e saj. Ajo që sjell në kulturën historike shqiptare libri i Ismail Strazimirit është dëshmia se parësia shqiptare, nëse mund të kuptojmë me këtë klasën qeverisëse me pushtet politik të mbështetur mbi tagrin etnozakonor, që për fat të keq vijon edhe sot, përgjatë kohëve nuk dëshmohet gjithnjë njëlloj, ka anën e vet të errët e të ndritur: në një brez ka arritur të bëjë shumë për vendin e në një brez tjetër ka dështuar ose i ka bërë të zezën atdheut. Dhe kjo provohet me dëshmitë e shërbyera prej autorit. Koment nga Shaban Sinani Ky libër do t'u vlejë dibranëve për të njohur historinë e lëvizjes atdhetare dhe të veprimit antikombëtar në dy dekadat e para të Shqipërisë shtetërore; do t'u vlejë historianëve jo vetëm për pasurinë e informacionit, por edhe për gjykimin dhe vlerësimin e situatave dhe sidomos për shumë pikëpyetje që shtron. Mbi autorin Ismail Strazimiri (1868 – 1943), megjithëse një figurë jo shumë e popullarizuar prej studimeve dhe shkrimeve, jashtë çdo dyshimi është një protagonist i rendit parësor në vendlindjen e tij në Dibër e në gjithë Shqipërinë për rolin që ka luajtur e peshën që ka mbajtur në rrjedhat e tubullta të historisë së lëvizjes kombëtare, prej shfaqjes së saj në formën e një ideologjie dhe përfytyrimi romantik deri në Luftën Antifashiste. Nëse pranohet si një e vërtetë parimore se provat e njeriut janë nyjat kritike të jetës së vendit të tij, Ismail Strazimiri pikërisht në nyjat kritike të historisë mbajti qëndrimet më të denja, duke i bërë nder vetes dhe historisë shqiptare, e cila shumë shpesh errësohet pikërisht prej mbrapshtisë, tinëzive, kurtheve e dredhive të flamurmbajtësve të saj.
