Titulli: Procesi i Nurembergut, vëllimi i dytë
Origjinali: Procesi i Nurembergut, vëllimi i dytë
Gjinia: Histori
Shqipëroi: Neki Kalaja
Shtëpia botuese: Onufri
Viti: 2005
fq. 416
Pesha: 0.51 kg
ISBN: 978-99943-32-50-3
Mbi librin
Vendimi i Gjykatës Ushtarake Ndërkombëtare mbledhur në Nuremberg Më 8 gusht 1945, Qeveria e Mbretërisë së Bashkuar, Qeveria e Bashkimit të Republikave Socialiste Sovjetike, Qeveria e Shteteve të Bashkuara të Amerikës dhe Qeveria e Përkohshme e Republikës Franceze arritën një marrëveshje, në përputhje me të cilën u krijua Gjykata për gjykimin e kriminelëve të luftës, krimet e të cilëve nuk lidhen me një vend të caktuar gjeografik.
Deklaruan për bashkimin e tyre në këtë marrëveshje, në përputhje me nenin 5, qeveritë e shteteve të mëposhtme: qeveria e Greqisë, e Danimarkës, e Jugosllavisë, e Holandës, e Çekosllovakisë, e Polonisë, e Belgjikës, e Etiopisë, e Australisë, e Hondurasit, e Norvegjisë, e Panamasë, e Luksemburgut, e Haitit, e Zelandës së Re, e Indisë, e Venezuelës, Uruguajit dhe Paraguajit. Statuti që i bashkohet marrëveshjes ka përcaktuar organizimin, juridiksionin dhe funksionet e Gjykatës.
Gjykata është e veshur me pushtetin për të gjykuar dhe dënuar personat që kanë kryer krime kundër paqes, krime lufte dhe krime kundër njerëzimit, siç janë përcaktuar në Statut. Statuti gjithashtu përcakton që gjatë shqyrtimit të çështjes për çdo anëtar të këtij apo atij grupi, apo organizate, Gjykata mund (lidhur me çdo veprim, për të cilin çdo person mund të gjykohet) të njohë se grupi apo organizata, anëtar i së cilës është i pandehuri, ka qenë organizatë kriminale.
Më 18 tetor 1945, në Berlin, në përputhje me nenin 14 të Statutit, Gjyaktës iu paraqit pretenca lidhur me të pandehurit e lartpërmendur, të cilët u thirrën nga Komiteti i të Pandehurëve Kryesorë që kanë nënshkruar marrëveshjen e shteteve si kriminelë kryesorë ushtarakë.
Kopja e pretencës në gjuhën gjermane iu dorëzua çdo të pandehuri, të paktën 30 ditë përpara fillimit të procesit. Sipas Pretencës, të pandehurit ngarkohen me fajin e kryerjes së krimit kundër paqes nëpërmjet planifikimit, përgatitijes, lënies së lirë dhe zhvillimit të luftërave agresive, të cilat janë edhe luftëra që shkelin traktatet ndërkombëtare, marrëveshjet dhe garancitë; krimet e luftës dhe krimet kundër njerëzimit.
Përveç kësaj, të pandehurit ngarkohen me fajin për pjesëmarrjen në krijimin dhe realizimin e planit të përgjithshëm apo të komplotit për kryerjen e të gjitha këtyre krimeve. Pretenca i kërkonte më tej Gjykatës që të shpallte të gjitha grupet ose organizatat e lartpërmendura si kriminale, sipas kuptimit të përcaktuar në Statut. Nënshkrimi i aktit të kapitullimit pa kushte të Forcave të Armatosura Gjermane
1. Ne, të nënshkruarit, duke vepruar në emër të Komandës së Lartë Gjermane, pranojmë kapitullimin pa kushte të të gjithë forcave tona të armatosura në tokë, në det e në ajër, si dhe të të gjitha forcave që në këtë çast ndodhen nën komandës gjermane, Komandën e Lartë Ushtrisë së Kuqe e njëkohësisht të Komandës së Lartë të Forcave Pushtuese Aleate.
2. Komanda e Lartë Gjermane do t'u japë menjëherë urdhër të gjithë komandantëve gjermanë të forcave tokësore, detare e ajrore që janë nën komandën e saj, të ndërpresin veprimet luftarake në orën 23.01 sipas kohës së Europës Qendrore, të datës 8 maj 1945, të qëndrojnë në vendet e tyre, aty ku do të ndodhen këtë çast dhe të çarmatosen plotësisht, duke ua dorëzuar armët e tyre dhe materialet e luftës komandave të vendit aleat ose oficerëve të caktuar nga përfaqësuesit e Komandës së Lartë të Aleatëve, duke mos prishur e duke mos u shkaktuar asnjë dëm anijeve, avionëve, motorëve të tyre, korpuseve dhe pajisjeve, gjithashtu makinave, aparateve dhe përgjithësisht teknikës dhe mjeteve të tjera të luftës.
3. Komanda e Lartë Gjermane do të caktojë menjëherë komandantët përkatës dhe do të sigurojë zbatimin e të gjitha urdhërave të tjera që do të shpallë Kryekomanda e Lartë e Ushtrisë së Kuqe dhe Komanda e Lartë e Forcave Pushtuese Aleate.
4. Ky akt nuk do të përbëjë pengesë për zëvendësimin e tij më ndonjë akt tjetër të përgjithshëm për kapitullimin, të përfunduar nga Kombet e Bashkuara ose në emër të tyre, për Gjermaninë dhe pëgjithësisht për forcat e armatosura gjermane.
5. Në rast se Komanda e Lartë Gjermane ose çfarëdo force tjetër e armatosur, që gjendet nën urdhrat e saj, nuk do të veprojë në përputhje me këtë akt kapitullimi, Komanda e Lartë e Ushtrisë së Kuqe si dhe Komanda e Lartë e Forcave Pushtuese Aleate do të ndërmarrin masa ndëshkuese ose masa të tjera që ata do t'i quajnë të domosdoshme.
6. Ky akt është hartuar në rusisht, anglisht dhe gjermanisht. Vetëm tekstet rusisht dhe anglisht janë autentike Nënshkruar më 8 maj 1945, në Berlin.
