Titulli: Gropas '67
Origjinali: Gropas '67
Gjinia: Roman
Autori: Teodor Laço
Shtëpia botuese: Tirana Times
Viti: 2014
Fq. 238
Pesha: 0.309 kg.
ISBN: 978-9928-4038-2
Mbi librin
Shkrimtari Teodor Laço i është rikthyer vitit 1967 për të shkruar romanin e ri titulluar "Gropas '67". Ngjarjet në roman zhvendosen në një fshat të humbur, që autori e quan thjesht Gropas. Aty është kampi i të internuarve. Në këtë vend, një ultësirë si bythë kazani, rrethuar me brinjë kodrinash dhe duna që e ndanin nga deti, rastësia apo fati, i gjeti nën të njëjtën strehë edhe tre njerëz të dëbuar nga kryeqyteti; Zigur Trushin, agjentin e fshehtë të Sigurimit të Shtetit me pseudonimin "Hija", inxhinierin Vllas Vishnja dhe poetin Miron Konjari. Galeria e personazheve në romanin e Teodor Laços është e gjerë, por rreth këtyre tre njerëzve ndërthuren jetë dhe realitete shqiptare që gjallojnë si të vërtetë.
Fragment nga libri
Si mund të jetë bota ime kjo skutë ku më detyrojnë t'i shtyj ditët? Në këtë jetë, ku të gjithë jemi udhëtarë, kam dashur të ec drejt një ëndrre. Këtu s'mund të bëj dot asgjë, përveçse të largohem nga ëndrra. Ta le të vdesë, ta varros. A nuk i varrosi kështu miku im i paharruar?
Në këtë Gropë bien edhe kujtimet. Drita e tyre po humbet, po shuhet, po ndyhet nga balta. Ja, kjo vërtet është e çuditshme. E pakuptueshme. A nuk i thërresim kujtimet e bukura të së shkuarës për të larguar zymtësinë dhe trishtimin e së sotmes?
Këtu në Gropas, edhe kjo pritje e dëshiruar e kujtimeve është nxirë prej përditësisë, prej asaj që je i detyruar të bësh, të thuash, të durosh, të pranosh dhe prej pritjes të së nesërmes që do të jetë njëlloj. Ishte një përçartje kllapie.