Titulli: Statusi i qenit
Origjinali: Statusi i qenit
Gjinia: Tregime
Autori:Teodor Laço
Shtëpia botuese: Toena
Viti: 2010
Fq. 216
Pesha: 0.201 kg.
ISBN: 978-99943-1-656-4
Koment nga autori
Nga shumë përcaktime që mund të më vijnë në mendje, duke medituar për rolin e humorit në moralin e shoqërisë dhe të individit, do të parapëlqeja t'i quaja një trokitje në portën e katarsit. Sigurisht për atë shoqëri dhe individ që është i vetëdijshëm dhe e pranon domosdoshmërinë dhe dobinë e katarsit.
Në jetë ndodh shpesh që e keqja të shfaqet e frikshme. Të duket e plotfuqishme. Por kjo nuk do të thotë që s'mund të mposhtet. Në luftën simbolike midis së Mirës dhe së Keqes, nga llogoret e letërsisë, humori është një armë asgjësuese. Ironia qep gojën e mburrjes, fudullëkut dhe shtirjes. Një shaka, në dukje e lehtë, mund të lërë një hidhësi që ngrin buzëqeshjet.
Është i lumtur ai njeri i mirë që e ka këtë dhunti. Në hapësirën e ngushtë, që i lejohej kritikës në sistemin totalitar, humori dhe satira shqiptare bën më të mirën e mundshme. Natyrisht, shigjetat e tyre e merrnin nishanin poshtë, pa guxuar të preknin vetë sistemin, por nënteksti i tyre shpesh ishte aq i qartë sa "teoricienët" e soc-realizmit të kërkonin që edhe në qendër të humorit të vihej heroi pozitiv!
Në ato vite, ndonëse nuk e pata humorin si domenin tim kryesor, nga libri në libër e "përndoqa" një personazh, kryetar kooperative që e quajta Mystehak Mullamake. Prej këtij cikli në këtë përmbledhje, zgjodha vetëm tregimin "Çështja e pulave".
Po ashtu zgjodha "Operacioni i Dolfit", botuar në "Drita" në maj të '90-ës, tregim që sipas dokumenteve arkivore, u bë objekt diskutimi deri në Byronë politike. Tregimet e tjera janë ngacmime të viteve të fundit, duke vjelë subjekte nga dy kohët: diktatura dhe demokracia. Ç'më shtyu? Mbase është e vërtetë ajo që thuhet se me kalimin e viteve, shkrimtari priret nga vështrimi komik...
