Duke shpresuar për një ditë të mirë, Arion Hysenbegas

Titulli: Duke shpresuar për një ditë të mirë
Origjinali: Duke shpresuar për një ditë të mirë
Gjinia: Roman
Autori: Arion Hysenbegas
Shtëpia botuese: Toena
Viti: 2016
Fq. 776
Pesha: 0.801 kg.
ISBN: 978-9928-205-58-2

Mbi librin

Romani "Duke shpresuar për një ditë të mirë" tregon çiltërsisht, me thjeshtësinë e të vërtetës jetën e një të riu të ndershëm, me botë të pasur shpirtërore dhe përgatitje të lartë, i cili kërkon të bëhet dikush (dhe, me të drejtë, meriton të lihet, madje të mbështetet për të ndjekur rrugën drejt synimit të vet), por e Keqja rreket ta pengojë.

Heroi i romanit është një njeri me karakter të pastër e të fortë, është i guximshëm e i drejtë. Ai përpiqet të mos epet, rreket të përballet me të Keqen, të luftojë me të, të ngadhënjejë mbi të, por e Keqja fshihet, vepron duke vënë në lëvizje mjete tinëzare, përdor shpifje dhe bën të duket e plotfuqishme.

Është dashuria ajo që nuk i lë të vyshken ëndrrat e heroit të romanit, është dashuria ajo që i ushqen atij besimin tek e Mira, është dashuria ajo që e qetëson, e çlodh, i jep forcë për të gjallëruar brenda vetes shpresën për një ditë të mirë...

Fragment nga libri

- ... Ditët tona!... Janë ditë për të cilat secili nga ne ka shumë për të thënë dhe njëkohësisht nuk ka asgjë... Ai kishte të drejtë për atëherë dhe për më vonë, edhe për në vazhdim. Ishin përherë ditë që merrnin me vete dhe shuanin brenda vetes çdo dëshirë për t'i kujtuar; ditë që linin pas një jehonë të turbullt, të patrajtë të vetën, një përzierje të veçantash me përkatësi të paveçueshme nga e tëra; ditë me ngjyra e ngjyrime, që zbeheshin, madje humbisnin fare nën përhitjen gjithëpërfshirëse...

Natyrisht, nuk qenë krejt të hirta apo të zeza. Në to zotëronte e hirta dhe, edhe kur jetoheshin grimca kalimtare me ngjyra jete, në thellësinë e tyre ndihej përherë e hirta, që herë-herë merrte ngjyrime më të errëta... Por ata ishin të rinj dhe shpresonin se do të vinte një ditë e mirë...