Titulli: Dikush si ti
Origjinali: Someone Like You
Gjinia: Roman
Autori: Sarah Dessen
Shqipëroi: Enkeleida Haxhinasto
Shtëpia botuese: Toena
Viti: 2015
Fq. 352
Pesha: 0.401 kg.
ISBN: 978-9928-205-01-8
Mbi librin
Heili dhe Skarleta kanë qenë shoqe të ngushta prej shumë vitesh – duke balancuar njëra-tjetrën në mënyrë të përsosur: Heili e qetë dhe e mbyllur, ndërsa Skarleta e hedhur dhe mjaft sociale – deri në verën kur ato mbushën 16 vjeç.
I dashuri i Skarletës, Majkëlli, gjen vdekjen në një aksident me motor pak kohë përpara se ajo të zbulonte se brenda saj po rritej fëmija e të ndjerit. Për herë të parë Skarleta ndien nevojën për të pasur afër Heilin, ashtu sikurse edhe vetë Heili kërkon afër Skarletën, sepse ajo sapo është hedhur në krahët magjikë të dashurisë së parë dhe ndodhet nën presionin e humbjes së virgjërisë.
Secila me problemet e veta, a do të mundet vallë të mbijetojë kjo lidhje shumëvjeçare e ngushtë, miqësie mes këtyre dy vajzave? Për më tepër ju ftojmë të lexoni romanin.
Fragment nga libri
Por Skarleta ishte aq e lumtur, saqë e kisha të pamundur t'i mbaja inat. Në fakt, shkëlqente të njëzet e katër orët e ditës, gjithnjë duke qeshur, tek ulej me Majkëllin jashtë në trotuarin përballë Miltonit apo tek kapte kokrrat e rrushit që ai i hidhte në gojë. Fshiheshin në shtëpinë e saj për fundjava të tëra, duke gatuar spageti për Marionin e duke marrë me qira filma.
Skarleta thoshte se pas ndarjes me Elizabetën në fund të vitit shkollor, Majkëlli nuk donte t'i dilnin thashetheme. Ditën që shkuam te liqeni, ishte hera e parë që kishin rrezikuar të zbuloheshin nga shokët e shoqet e klasës. Por plazhi ishte i zbrazët e i qetë.
Luajtëm me Frisbi dhe hëngrëm ushqimin që Skarleta kishte marrë me vete. Qëndroja e ulur me revistën time "Mademoiselle" dhe i shihja tek notonin së bashku, duke zhytur njëri-tjetrin e duke qeshur. Më vonë, kur po largoheshim e kur dielli prapa tyre kishte marrë ngjyrë të portokalltë e të kuqe, i bëra një fotografi të çastit, e vetmja që Skarleta kishte me të.
Ma rrëmbeu nga dora. Më mori edhe kopjen tjetër të fotografisë dhe ia dha Majkëllit, i cili e vuri mbi shpejtësimatësi në makinën e tij. Dhe aty qëndroi derisa pak javë më vonë, ai e shkëmbeu makinën me motorin.
Mbi autoren
Sarah Dessen lindi më 1970 në Evaston, Illinois. Ajo u rrit në Karolinën e Veriut, ku prindërit e saj, profesorë letërsie, jepnin mësim në universitet. Dessen-i kreu liceun "Chapel Hill High School" dhe më pas u diplomua për gjuhë angleze dhe letërsi në Universitetin e North Carolina-s "Chapel Hill".
Fillimisht punoi si kameriere dhe shkruante gjatë kohës së lirë. Romani i saj i parë "That Summer" u publikua më 1996, i cili u pasua nga tjerë "Dikush si ti" (1998), "Dreamland" (2000), "Just Listen" (2006), "Saint Anything" (2015) etj. Bazuar në librin "Dikush si ti", në vitin 2003, u realizua filmi "Shkolla e jetës".
Shumica e romaneve të Dessen-it trajtojnë ndryshimet që ndodhin në personalitetin e të rinjve që përjetojnë një lloj tragjedie apo humbjeje. Temat kryesore që përshkojnë romanet e saj përfshijnë izolimin, shkëputjen emocionale mes anëtarëve të familjes, apo ndryshimin progresiv të personalitetit të njeriut. Sot, ajo radhitet në SHBA ndër shkrimtarët më të lexuar të librave për adoleshentë.