Titulli: Shpirt i trazuar gruaje
Origjinali: Shpirt i trazuar gruaje
Autor: Sokrat Habilaj
Gjinia: Roman
Shtëpia botuese: Naimi
Viti: 2010
Fq. 626
Pesha: 0.60 Kg.
ISBN: 978-99956-859- 8-0
Mbi librin
Këto ditë ka dalë në qarkullim romani më i ri i autorit Sokrat Habilaj, "Shpirt i trazuar gruaje". Ky roman është një ndërmarrje e guximshme për të evidentuar dhe zbërthyer botën e brendshme të personazheve, përthyerjen, transformimin, degradimin deri në përdhosje të personalitetit që ata pësojnë shpesh. Ata nuk njohin asnjë masë në udhën që i shtynë etja e tyre për pushtet, duke u zgërlaqur në baltën e shoqërisë.
Ata nuk dashurojnë, por cinikisht tradhtojnë. Ata nuk rrëzohen, por rrëzojnë të tjerët. Ata nuk i shtyp askush, ata poshtërojnë të tjerët. I vetmi mbytës i tyre është vesi. Dhe nga ana tjetër, përballë kësaj turme të baltosur, është skalitur fytyra dhe shpirti i bukur e një gruaje. Ajo di vetëm të dashurojë, por atë e tradhtojnë. Ajo jep nga shpirti i saj atë që ka më të bukur, por merr si shpërblim cinizmin e të tjerëve. Atë e rrëzojnë, por ajo nuk dorëzohet. Ajo falë, por di edhe të hakmerret.
Ajo hakmerret butësisht ashtu siç mund të hakmerret vetëm shpirti i madh i një gruaje. Shpesh duket se femrat vinë dhe ikin nga kjo jetë pa u njohur plotësisht askush. Duket se shpirti i tyre nuk është gjë tjetër veçse copëza të shpërndara lumturie dhe trishtimi që askush nuk mundet t'i mbledhë e të krijojë një fytyrë të vetme, të njohur deri në fund. Ja kështu, në këtë lumturi-trishtim të tyre, ne nuk bëjmë gjë tjetër veçse rrekemi t'i njohim ato sa më shumë, gjë që në këtë roman rezulton si një ndërmarrje e bukur.
Nëse doni të njiheni me fragmente të shpirtit të një gruaje, ju duhet të lexoni romanin më të ri të shkrimtarit Sokrat Habilaj, me titull: "Shpirt i trazuar gruaje". Në përfundim do të keni të skalitur një imazh që do ngelet për një kohë gjatë në memorien tuaj. Mos e lini t'ju iki ky rast.
