Titulli: Terminologji informatike
Origjinali: Terminologji informatike
Gjinia: Terminologji
Autori: Edmond Tupja, Erion Çano
Shtëpia botuese: UET Press
Viti: 2022
Fq. 112
Pesha: 0.217 kg
ISBN: 978-9928-320-83-4
Ky libër është në gjuhën shqipe
Mbi librin
Digjitalizimi dhe lidhja në internet e veprimtarive shoqërore dhe e krejt informacionit të lidhur me to po ndikojnë në një masë të madhe te gjuhët e vendeve të ndryshme. Për këtë arsye, aspektit cilësor të gjuhëve në internet po i kushtohet një vëmendje e veçantë vitet e fundit. Nisur nga vrojtimet tona, problemet e drejtshkrimit, shtrembërimet fonetike, mospërshtatja e fjalëve të huaja dhe çështje të tjera të shkrimit të shqipes në internet janë serioze dhe po shfaqen në mënyrë të frikshme e me pasoja të shumta. Këto problematika kanë qenë shtysat kryesore për punën studimore që paraqitet në këtë libër, i cili përfaqëson një shqyrtim të gjerë bibliografik të përqendruar tek terminologjia e teknologjisë së informacionit dhe botimet e lidhura me të. Pavarësisht titullit të përmbledhur që kufizohet tek disiplina e informatikës, bibliografia e shqyrtuar është e larmishme dhe analiza terminologjike shtrihet jo vetëm në drejtimet më specifike të informatikës, por edhe në fusha të tjera të lidhura ngushtësisht me teknologjinë e informacionit, si matematika, logjika, statistika, elektronika analoge, elektronika numerike, telekomunikimi etj. Veç vënies në dukje të problemeve, jemi përpjekur të japim zgjidhje për secilin prej tyre duke sugjeruar përkthime për shumë fjalë e shprehje të vështira, duke propozuar neologjizma, duke sugjeruar rijetësimin e disa fjalëve të harruara etj. Diskutohen me imtësi rreth 500 kuptime fjalësh e shprehjesh, që shoqërohen me rreth 600 citime nga bibliografia. Secili citim përfaqëson një përdorim të saktë, të pasaktë ose të diskutueshëm të fjalës që shqyrtohet. Është zhbiruar fund e krye terminologjia në 31 tekste shkollore, nga të cilat 19 janë për klasat e arsimit parauniversitar dhe 12 për lëndë të ndryshme të arsimit universitar. Janë shqyrtuar gjithashtu me imtësi 2 tekste universitare në gjuhën italiane (për referenca ndërgjuhësore), 9 fjalorë të vjetër shumëgjuhësh (në gjuhën shqipe dhe disa gjuhë të tjera) të disiplinave tekniko-shkencore, 3 fjalorë në gjuhët angleze, italiane dhe frënge, 4 fjalorë të përgjithshëm në gjuhën shqipe (FGJSSH dhe tre të tjerë), 2 botime të natyrës informuese, 2 studime gjuhësore, si dhe 4 artikuj studimorë të viteve të fundit.
