Titulli: Shko, vër një rojë
Origjinali: Go Set a Watchman
Gjinia: Roman
Autori: Harper Lee
Shqipëroi: Oriana Tamburi
Shtëpia botuese: Omsca – 1
Viti: 2016
Fq. 336
Pesha: 0.401 kg.
Mbi librin
Doli në qarkullim nëpër libraritë e vendit romani "Shko, vër një rojë" (Go Set a Watchman), i autores së njohur amerkane Harper Lee, botim që njohu një sukses të jashtëzakonshëm si edhe romani i saj i parë, i cili kishte mbetur i pabotuar deri më sot, se mendohej se origjinali i shkruar kohë më parë me makine shkrimi kishte humbur.
Fragmente nga libri
- Ë, hëm. Jo një fanatike e madhe...
Zhan Luiza u ngrit në këmbë dhe u afrua te rafti i librave. Ajo mori një fjalor dhe e hapi.
- Fanatik, - lexoi ajo. - Emër. Një njeri që i përkushtohet me kokëfortësi... partisë, besimit ose opinionit të vet. Mund të më japësh një sqarim, zotëri?
- Thjesht po mundohesha t'i jepja përgjigje pyetjes sate. Më lër ta zhvilloj pak më shumë atë përkufizim. Çfarë bën një fanatik, kur ndesh një njeri që kundërshton opinionet e tij? Nuk lëshon pe. Është i ngurtë. Madje as nuk bën ndonjë përpjekje për të dëgjuar, thjesht vjell zemërim drejt bashkëfolësit. Tani ti, ti pe që e gjithë bota jote u kthye kokëposhtë nga babai shembullor, kështu që ia mbathe vrapit. Dhe çfarë vrapi se! Pa dyshim që ke dëgjuar biseda agresive, që kur je kthyer në shtëpi, por në vend që t'u përvisheshe qorrazi atyre që i thoshin ato, ti u ktheve shpinën dhe ia mbathe vrapit. Ti, në fakt, the: "Nuk më pëlqen mënyra se si i bëjnë gjërat këta njerëz, nuk kam kohë për të humbur me ta". Bën mirë ta gjesh kohën për t'u marrë me ta, zemër, përndryshe nuk do të arrish kurrë. Do të jesh njësoj si tani edhe kur të mbushësh gjashtëdhjetë vjeç... atëherë ke për të qenë rast studimi...
- E po, në fillim të duhet një djalë. Pastaj ai të përqafon, të shtrëngon shumë fort dhe të jep puthje me gjuhë. Kjo domethënë që ai, kur të puth ty, e hap gojën dhe e fut gjuhën e vet në gojën tënde... - Ajo kishte ndier një oshtimë në veshë, që e kishte mbytur zërin e Ada Belës.
E kishte ndier se gjaku po i ikte nga fytyra. Pëllëmbët e duarve i ishin njomur nga djersa dhe ishte munduar të kapërdinte pështymën. Do të kishte dashur të largohej prej aty, por nuk mundej. Po të largohej, ato do ta kuptonin.
Ajo ishte ngritur në këmbë, ishte përpjekur të buzëqeshte, por buzët po i dridheshin. Ajo i kishte shtrënguar fort buzët... po ashtu edhe dhëmbët. - ...dhe kaq është e gjitha. Si është puna, Zhan Luiza? Je zbardhur si gëlqere. Mos të tremba gjë, ë? - ishte zgërdhirë Ada Bela.
- Jo, - i ishte përgjigjur Zhan Luiza. - Thjesht po ndiej të ftohtë. Them të hyj brenda.
Teksa ecte në oborrin e shkollës, ajo ishte lutur me vete që ato të mos ia vinin re gjunjët që po i dridheshin. Mandej kishte hyrë në banjën e vajzave dhe kishte nxjerrë në duarlarëse ç'kishte në stomak. Nuk kishte pikë dyshimi. Alberti ia kishte cikur buzët me gjuhë. Ajo ishte shtatzënë.
Koment nga Washington Post
"Shko, vër një roje" është një libër që të mahnit..."
Mbi autoren
Harper Lee është lindur në vitin 1926 në Monrovilë të Alabamës. Ajo është e njohur në vendin tonë me romanin e saj të famshëm e ndër më të lexuarit në botë "Të vrasësh zogun përqeshës" (To Kill a Mockingbird), një nga romanet më të dashur për lexuesin amerikan, që e vulosi emrin e saj në historinë e letërsisë botërore dhe është nderuar me Çmimin prestigjioz "Pulitzer", me Medaljen e Lirisë nga presidenti i Shteteve të Bashkuara të Amerikës dhe me shumë çmime e vlerësime të tjera letrare. Harper Lee vdiq në gjumë, në mëngjesin e 19 shkurtit, në moshën 89 vjeçare.
