Titulli: Tri kohë të Shqipërisë në Time, nga Ahmet Zogu te Enver Hoxha dhe Sali Berisha 1923 – 2013
Origjinali: Tri kohë të Shqipërisë në Time, nga Ahmet Zogu te Enver Hoxha dhe Sali Berisha 1923 – 2013
Gjinia: Histori
Autori: Belina Budini
Shtëpia botuese: UET Press
Viti: 2014
Fq. 362
Pesha: 0.597 kg.
ISBN: 978-9928-190-08-6
Koment nga Ismail Kadare
Libri i Belina Budinit "Tri kohë të Shqipërisë në Time", tregon, veç të tjerash, se paradigma e kohës, është po aq e përshtatshme për tekste studimorë, sa ç'është e tillë për metafora poetike. Titulli është i bukur. Dhe jo vetëm titulli. Teksti ka prirjen ta shtyjë mendimin përtej asaj që lexon.
Flitet për tri kohë të Shqipërisë, por lexuesi natyrshëm synon drejt një kohe të katërt, asaj që na vjen. Për këtë s'është nevoja e frazave shëlbyese të tipit: të mos mbetemi rob të asaj që shkoi, por t'i kemi sytë nga e ardhmja.
Përftimi i kohës e ka të natyrshme si lëvizjen, si drejtimin e saj. Në këtë libër flitet për kohën e një vendi, thënë ndryshe, ç'ndodhte në vendin e quajtur Shqipëri dhe si pasqyrohej kjo mijëra kilometra larg në një nga revistat kryesore të krejt rruzullit tokësor.
Libri i Belina Budinit, përveç që përbën një risi në botimet shqiptare, del në një kohë kur ndjeshmëria e publikut shqiptar ndaj atij botëror, ka marrë një kuptim të veçantë. Shqipëria është duke u përshtatur për të hyrë në kohën europianoperëndimore, ndaj opinionet e kësaj të fundit, nuk janë më çështje kureshtjeje, por pjesët e historisë bashkëkohore shqiptare.
Mëdyshja me titullin hamletian: të dish a të mos dish ç'thotë tjetri, ka vetëm një përgjigje: detyrimin për të ditur. Ky libër ndihmon pikërisht për këtë.
Mbi autoren
Belina Budini, drejtuese e Departamentit të Marrëdhënieve Publike dhe Komunikimit në Universitetin Europian të Tiranës. Si pedagoge dhe studiuese, fusha e saj e ekspertizës janë mediat dhe shkencat e komunikimit.
Kjo është monografia e dytë e saj, e publikuar në këtë fushë, pas librit "Edi Rama, politikani pop(ulist) – star" në vitin 2009, libër i cili kurorëzoi studimet pasuniversitare në Goldsmiths College, University of London.
Libri "Tri kohë të Shqipërisë në Time" lidhet gjithashtu me studimet e saj pasuniversitare, për marrjen e gradës Doktor i Shkencave nga Universiteti i Tiranës, në dhjetor 2013. Projekti kërkimor i nisur me revistën më të madhe amerikane të aktualitetit, revistën Time, në kuadër të doktoraturës së kryer, vijon që prej një viti, edhe me të përditshmen amerikane New York Times në cilësinë e kërkueses shkencore pranë shkollës doktorate, në UET.
Autorja publikon rregullisht artikuj shkencorë dhe recenca librash në revista shkencore brenda dhe jashtë vendit. Kontribuon me artikuj publicistikë dhe analiza mediatike edhe në të përditshmet e aktualitetit të përgjithshëm.
