Titulli: Fundi i varfërisë, Mundësitë ekonomike të kohës sonë
Origjinali: The end of poverty: Economic possibilities for our time
Gjinia: Ekonomi
Autori: Jeffrey D. Sachs
Shqipëroi: Gjergj Erebara
Shtëpia botuese: Papirus
Viti: 2010
Fq. 430
Pesha: 0.72 kg
ISBN: 978-99956-808-4-8
Mbi librin
Një pikë referimi për rrënjët e begatisë ekonomike dhe shtegun që nxjerr nga varfëria e skajshme njerëzit më të varfër të botës. I përshëndetur nga Times si një nga 100 njerëzit më me ndikim të botës, Jeffrey Sachs është i njohur anembanë botës për punën e tij në shumë vende si këshilltar në kohë krizash. Ai ka këshilluar një pafundësi udhëheqësish botërorë dhe institucione ndërkombëtare mbi sfidat që krijojnë hiperinflacioni, epidemitë, tranzicioni postkomunist dhe varfëria ekstreme. Tani, më në fund, ai përshkroi gjithçka që ka mësuar nga njëzet e pesë vite punë për të na dhënë një vizion unik për nga informacioni, mbi sekretet e suksesit ekonomik në botën e sotme dhe hapat që duhet të ndërmerren për të krijuar mirëqënie për të gjithë.
Duke kombinuar tregimin plot gjallëri dhe pasion me një analizë të thellë dhe të fortë, Jeffrey Sachs paraqet fillimisht te Fundi i varfërisë një hartë të qartë konceptuale të ekonomisë botërore. Ai shpjegon se pse, gjatë dyqind viteve të fundit, pasuria është ndarë nëpër planet dhe pse vendet e varfëra kanë dështuar në përmirësimin e pjesës së tyre.
Ai shpjegon se si mund të arrihet në një diagnozë të thelluar të sfidave ekonomike të një vendi dhe mundësitë mes të cilave ky vend duhet të zgjedhë. Ai i udhëheq lexuesit përmes të njëjtit shteg mësimor që ai ka përshkuar vetë, duke na treguar ngjarjet e punës së tij në Bolivi, Poloni, Rusi, Indi, Kinë dhe Afrikë si një mënyrë për t'i marrë lexuesit me vete te kuptimi i thelluar i sfidave me të cilat u përballën vendet në zhvillim në anë të ndryshme të botës.
Në fund, ai ofron një grup të integruar zgjidhjesh për problemet e ndërthurura politike, ekonomike, mjedisore dhe shoqërore, të cilat sfidojnë shoqëritë më të varfëra të botës dhe në të vërtetë pengojnë të gjithë botën. Më në fund, Fundi i Varfërisë u jep mundësi lexuesve jo vetëm të kuptojnë se sa i rëndë është problemi i varfërisë, por edhe se sa i zgjidhshëm - si dhe shpjegon se pse kryerja e të gjitha përpjekjeve për këtë qëllim është sa detyrim moral, aq edhe interes strategjik për vetë vendet e pasura. Një vepër me vizion mahnitës intelektual, rezultat i një eksperience të paprecedent mbi botën reale, Fundi i Varfërisë është një udhërrëfyes për një botë më të sigurt dhe më të lumtur për të gjithë ne.
Mbi autorin
Jeffrey D. Sachs është Drejtor i Institutit të Tokës në Universitetin e Kolumbias dhe Këshilltar i Posaçëm i Sekretarit të Përgjithshëm të Kombeve të Bashkuara, Kofi Annan, për Objektivat e Zhvillimit të Mijëvjeçarit. Ai është i mirënjohur në të gjithë botën për punën e tij si këshilltar ekonomik për qeveritë në të katër anët e planetit.
Komente mbi librin
"Jeffrey Sachs është një fenomen i rrallë: ekonomist akademik, i famshëm për teoritë e tij mbi arsyet pse disa vende janë të varfra dhe disa të pasura, por gjithashtu i famshëm për punën e tij praktike të suksesshme për të ndihmuar që vendet e varfra të bëhen më të pasura. Në këtë libër të pritur me padurim, mahnitës, të shkruar qartë dhe me pasion, ai shfrytëzon përvojën e tij për të propozuar përgjigje për vendimet e vështira që bota ka përpara."
Jared Diamond, autor fitues i Çmimit Pulitzer për librin Armët, Mikrobet, dhe Çeliku e Rënia
"Po, Jeff Sachs është ëndërrimtar, por ëndrrat e tij burojnë jo vetëm nga idealizmi por edhe nga analiza e mirë dhe përvoja mbresëlënëse. Nëse interesoheni për zhvillimin ekonomik dhe për të varfërit në botën në zhvillim, atëhere ky libër është i detyrueshëm."
Ernesto Zedillo, ish-President i Meksikës
"Profesor Sachs na ka dhënë një vizion të fuqishëm dhe nxitës për zhdukjen e varfërisë në botë deri në vitin 2025. Analiza dhe përfundimet e Sachs-it janë të mbushura me gjithë përvojën praktike të 20 viteve në terren - duke punuar në dhjetra vende në të gjithë rruzullin për t'i hapur rrugë zhvillimit ekonomik dhe rritjes së mirëqenies."
George Soros, financier dhe filantropist
"Jeffrey Sachs trajton sfidat thelbësore për të gjithë ne: Ai u flet mendjeve dhe zemrave tona - nga përvoja e tij e gjerë e një botë të gërshetuar. Nga zëri i tij bindës burojnë arsyeja dhe premtimi."
Gro Harlem Brundtland, ish-Kryeministre e Norvegjisë dhe Drejtore e Përgjithshme e Organizatës Botërore të Shëndetësisë
"Zhvillimet e kohëve të fundit të shkencës moderne dhe teknologjisë na kanë mbushur me shpresë se varfëria kronike nuk ka pse të jetë fati i pashmangshëm i pjesës më të madhe të racës njerëzore. Libri i Profesor Sachs-it na jep një pamje të qartë të suksesit të arritur në këtë drejtim në shumë vende në zhvillim dhe pajis me mësime të dobishme të gjithë zbatuesit e politikave për çrrënjosjen e varfërisë dhe zhvillimin ekonomik."
Manmohan Singh, Kryeministër i Indisë
