Dallga e shtatë, Daniel Glattauer

Titulli: Dallga e shtatë
Origjinali: Alle sieben Wellen
Gjinia: Roman
Autori: Daniel Glattauer
Shqipëroi: Rezarta Reimann
Shtëpia botuese: Fjala Publishing
Viti: 2015
Fq. 257
Pesha: 0.301 kg.
ISBN: 978-9928-176-09-7

Mbi librin

Ju i njihni Emi Rothnerin dhe Leo Leiken? Pra, ju e keni lexuar tashmë "A të kam folur ndonjëherë për erën e veriut?", këtë histori të pazakontë dashurie, ku dy njerëz dashurohen duke shkëmbyer mesazhe e-mailesh, por pa e parë kurrë njëri-tjetrin.

Për ju historia e Emit dhe Leos ka përfunduar. Ndoshta për ju. Por jo për Emin dhe për Leon! Ju jeni të mendimit se të dashuruarit e meritojnë të paktën një përballje të vetme reale dhe se ky roman e meriton një mundësi të dytë me një tjetër përfundim? Ja ku e keni atë! Ju nuk e keni idenë se për çfarë po flitet? Pra, ju filloni të lexoni "Valën e shtatë" pa ndonjë njohuri mbi erën e veriut? S´ka problem.

Ja çfarë duhet të dini: Leo Leike, pas një viti që ndenji në Boston, kthehet në apartamentin e tij në Vjenë. Aty atë e presin mesazhet e Emi Rothnerit. Të dy e kuptojnë shpejt se ndjenjat ndaj njëri-tjetrit janë ende të gjalla. Ndoshta ata duhet të takohen vërtet një herë të vetme.

Por Leoja është i lidhur ndërkohë me një vajzë tjetër, ndërsa Emi është ende e martuar. Gjithsesi, në romanin e ri të Daniel Glattauer-it mësojmë se, kur gjashtë valët e para e kanë shkumëzuar bregun, pritet vala e shtatë. Dhe ajo gjithmonë të befason me furinë e saj.

Fragment nga libri

"Si duhet të vazhdojë më tej me ne, Leo? - Ashtu si tani.
A duhet të vazhdojë historia jonë? - Patjetër.
Në ç'drejtim? - Askund. Thjesht të vazhdojë. Ti jeton jetën tënde. Unë jetoj jetën time. Dhe ç'mbetet, e jetojmë së bashku."

Koment nga Volker Hage

"Një nga dialogët e dashurisë më magjepsëse dhe të mençur të së tashmes."

Mbi autorin

Daniel Glattauer, shkrimtar dhe gazetar, ka lindur në vitin 1960 në Vjenë. Ja disa nga librat e shkruar prej tij: "Numërimi i milingonave" (2001); "Sepse" (2003); "Zogjtë ulërijnë" (2004); "Qeni i Krishtlindjes" (botim i ri, 2004).

Romani "A të kam folur ndonjëherë për erën e veriut?" (2006) arriti të bëhej bestseller dhe është përkthyer tashmë në shumë gjuhë të huaja. Ai ka korrur sukses edhe në formë të përpunuar për teatër, si dhe i digjitalizuar.