Largësi të kaltra, Gazmend Mahili

Titulli: Largësi të kaltra
Origjinali: Largësi të kaltra
Gjinia: Tregime dhe novela
Autori: Gazmend Mahili
Shtëpia botuese: Toena
Viti: 2016
Fq. 120
Pesha: 0.131 kg.
ISBN: 978-9928-205-55-1

Mbi librin

Vëllimi "Largësi të kaltra" përfshin dy novela: "Largësi të kaltra" dhe "Melodi e një dashurie të ndërprerë" - kjo e fundit, mbase më e realizuara dhe më e bukura e librit, me një theks aktual, sidomos në kushtet e sotme të Shqipërisë, ku vihen përballë njëri-tjetrit individi dhe komuniteti ku jeton, mentalitetet e raportet në mes tyre kur është fjala për dashurinë, për ndryshimin në tërësi, për një jetë ndryshe, jorutinore e monotone, për të gëzuar jetën dhe lirinë - si dhe tri tregime, respektivisht: "Gjahtari i shkretëtirave", "Dashuri fatale" dhe "Parandjenja".

Gazmendi, duket se i është përkushtuar me seriozitet pasionit, çka dëshmon se kemi të bëjmë me një autor të talentuar dhe me kërkesa ndaj letërsisë që shkruan, e cila lexohet vërtet me endje. Pra, vëmë në dukje se s'kemi të bëjmë thjesht me një botim premierë dhe me promovimin e një autor të ri, përkundrazi, të një kolegu të ri, të cilit me gjithë zemër le t'i themi: "Mirë se erdhe në fushën e letrave!".

Fragment nga libri

Për Françeskën, në jetë asgjë nuk mund të kuptohej pa shpirtëroren, pa atë që përbënte thelbin e së këndshmes, ndaj ajo e urrente vrazhdësinë, por përpara syve të njerëzve ajo kurrë nuk ishte mbrojtur dot. Megjithëse në shpirt e ruante me xhelozi idealin e së bukurës, sytë e tyre e kishin parë përherë si një kurvë rrugësh, si një trup prej mishi, që mund të jepte kënaqësi dhe asgjë më tepër.

Kishte diçka të paarsyeshme mbi arsyetimin e tyre të ftohtë, alogjik ndaj saj, ndërsa Françeska tani po fliste qetësisht: "Të gjithë ne në këtë sallë duhet të pyesim veten se përse e vrau veten Geslanda Grasia? A mos vallë nuk dinte të jetonte në këtë botë? Jo, atë e vramë ne, e vrau turma.

Po unë kurrë s'kam dashur të merrem me turmën, ndaj edhe sot nuk do të merrem me të". Françeska s'tentonte të bindte asnjë, por fjalët e saj tingëllonin si akuzë për këdo që e dëgjonte në atë çast. "Po kush ishte i dashuri i saj?! A do të gjendet ndonjëherë? E përse duhet të gjendet? Për ta ngjitur në bankën e të akuzuarve? Po a nuk do të ishte kjo diçka e tmerrshme, diçka e turpshme? A mund të flitet për kriminelë në një ndjenjë të tillë siç është dashuria?! Flisni! Përgjigjuni!".

Mbi autorin

Gazmend Mahili lindi në Sevaster të Vlorës, më 3 prill 1973. Fëmijërinë dhe adoleshencën i kaloi në vendlindje. Studimet e larta i kreu në Fakultetin e Historisë dhe të Filologjisë, dega Gjuhë-Letërsi, në Universitetin e Tiranës, ku dhe u diplomua në vitin 1996. Si prozator, Mahili ka spikatur që herët në mjediset letrare.

Dy librat e tij të mëparshëm janë: "Madhështia e mbrapshtë" (novela) dhe "Humbësit e dëshirave" (romane), me të cilët është paraqitur si një prozator i talentuar para publikut. Libri "Largësi të kaltra" është vepra e tij më e fundit me tregime dhe novela, ku ai i thellon më tej cilësitë e prozës së tij, e cila dallohet për thellësi mendimi dhe një psikologji universale.