Vitet e trilleve, Jonada Feimi

Titulli: Vitet e trilleve
Origjinali: Vitet e trilleve
Gjinia: Prozë
Autori: Jonada Feimi
Shtëpia botuese: Ombra GVG
Viti: 2015
Fq. 60
Pesha: 0.121 kg.
ISBN: 978-9928-06-111-9

Koment nga Edmond Tupja

Një ditë ajo e pa veten të martuar. Larg vendlindjes plot diell, plot të afërm e miq. E pa veten të ngujuar në mërgim. Në një ishull të largët verior të një vendi aq të lakmuar sot nga emigrantët e mbarë botës. Në një banesë me tridhjetë e pesë metra katrorë.

Me të shoqin dhe fëmijën e porsalindur. Me ëndrrat e saj rinore të thurura bukur, por tashmë të venitura. Me kujtime të fosilizuara. Pa asnjë mundësi për të dalë nga zymtësia mbytëse e një rutine të përditshme pabesisht tjetërsuese.

Atëherë, për të mos iu dorëzuar zhgënjimit ankthprurës dhe dëshpërimit ekzistencial, ajo shkruan. Shkruan këtë novelë. Për t'u thënë bashkatdhetarëve të saj të rinj se mërgimi ngre një problem, por nuk jep zgjidhje. Ai vetëm sa ta shpërbën shpirtin.

Fragment nga libri

... Mbase një sipërfaqe prej tridhjetë e pesë metrash katrorë mund të ishte parajsa ime, nëse në mure do të ishin të varura njëqind korniza druri secila me një fletë poezie brenda, nëse një cep i shtëpisë do të kishte një piano të vjetër, nëse në këndin tjetër do të gjendej një bibliotekë me tërë librat e mi dhe nëse në cepin përbri do të ndodhej një llambë e vogël, një tryezë shkrimi, një tavëll duhani dhe një gotë e rëndë konjaku.

Një krevat sa për të fjetur dhe një garderobë e tërë me rroba. Në fakt, kjo e fundit bën një kontrast të madh me karakterin tim: si vajzë leximtare që jam, duhet të kem përbuzje për modën, por ja që me mua nuk ndodh kështu. Mos vallë, kjo do të thotë se karakteri im ende nuk është formuar mirë? Ose që unë pretendoj të jem diçka tjetër, por në të vërtetë nuk jam?