Titulli: Nëse një ditë një prelud (kopertinë e trashë)
Origjinali: Nëse një ditë një prelud
Gjinia: Tregime
Autori: Gazmend Krasniqi
Shtëpia botuese: Onufri
Viti: 2014
Fq. 136
Pesha: 0.326 kg.
ISBN: 978-9928-186-26-3
Koment nga autori
A mund të jesh të paktën mbret i fjalëve? Gjuhës që konturon dhe mbrun përvoja. Që ndan dhe bashkon. Që është e kompozueshme, e diskutueshme, e ëndërrueshme, e interpretueshme, e dëgjueshme, e recitueshme, e heshtur, e falshme, e përkthyeshme, e tregueshme, e rimueshme...
Ja kështu, herë pas here, përpiqem të vë ndonjë rend fjalësh, derisa kujtohem për dështimin e përhershëm, ose siç thuhet rëndom sot, thjesht ato kanë folur nëpërmjet meje.
Komente mbi autorin
"Ka një rimodelim të strukturave të të menduarit artistik e mbështetur në traditën vendase, mekanizmin e fantastikës së përrallës dhe legjendës, e shfrytëzuar edhe nga autorë të tjerë (Agolli, Kadare), por në një tjetër cilësi thurjesh e përdorimit të fjalës që nis nga indet, kombinimi i rrafsheve kohore dhe i ngjyrimeve të ligjërimit, deri në makrostrukturën e veprave, ku pikëtakohet me prozën bashkëkohore."
Mehr Licht (nr. 22)
"Në romanet, si dhe në tregimet, interesohet më fort për mënyrën se si tregohet një histori sesa për vetë historinë, sado e çuditshme të jetë ajo. Krasniqi bashkohet me idenë se "forma e përdorur një herë del jashtë përdorimit dhe vlen për aq sa na nxit të kërkojmë një tjetër".
Në vartësi të subjektit që ndërron, ai ndërron edhe stilin, duke kërkuar atë që kjo vepër të mishërohet. Kështu, çdo vepër ndryshon pozitivisht nga pikëpamja e formës letrare. Edukimi i parë si nxënës i një shkolle arti, si dhe puna shumëvjeçare si drejtues i një galerie arti e shënjojnë thellësisht edhe veprën e tij letrare: kjo duket në kolazhet dhe pastiche – t që përzihen me format më tradicionale të të rrëfyerit, ku gjëra, shpesh të pangjashme, ngjiten për të krijuar një realitet të ri, i cili mund të jetë shumë gjëra të tjera.
Kjo përforcohet nga krijimi i fundit të hapur dhe situatat e pangulitura. Nga stereotipet e prozës, klishetë gjuhësore dhe rregullat kanonike të shkrimit, ai përdor ato që mund të marrë në mbrojtje në një epokë ku janë vënë në dyshim fuqitë e letërsisë."
www.albavista.eu
Mbi autorin
Poet, prozator, dramaturg, eseist dhe historian i letërsisë, Gazmend Krasniqi është përfshirë në disa antologji të poezisë shqipe në botë. Gjithashtu, është përfshirë në antologjinë "New European Poets" (Poetët bashkëkohorë europianë), Graywolf Press, SHBA. Ka doktoruar me temën "Poezia shqipe si histori letrare".
Disa nga botimet e tij të fundit janë: "Shitësit e Apokalipsit" (2012), "Fytyra e Simurgut" (2014), "Fletorja e poemave" (2014) dhe "Antologji e poezisë shqipe" (bashkautor, 2014).
