Lufta e nervave e komisarit Megre, Georges Simenon

Titulli: Lufta e nervave e komisarit Megre
Origjinali: Le tete d'un homme
Gjinia: Roman
Autori: Georges Simenon
Shqipëroi: Xhimi Lazri
Shtëpia botuese: Linus
Viti: 2013
Fq. 176
Pesha: 0.198 kg.
ISBN: 978-9928-136-13-8

Mbi librin

Në datën 7 korrik, në një vilë në një nga lagjet e Parisit, gjenden të vrara dy gra: zonja Henderson, një vejushë e pasur amerikane, së bashku me shërbyesen e saj. Shumë shpejt policia arreston Zhozef Ërtënin, një djalosh njëzet e shtatë vjeçar, praninë e të cilit në vendin e krimit e vërtetojnë një sërë gjurmësh që ai ka lënë në vilë.

Për të gjithë ai është fajtor; gjykata e dënon me vdekje. I vetmi që s'beson në fajësinë e tij është komisari Megre, i cili fshehurazi organizon arratisjen e tij nga burgu, me shpresë se kësisoj ai do t'i çojë te vrasësi i vërtetë...

Fragment nga libri

Diku në burgun e Santesë një orë ra dy herë. I burgosuri po rrinte ulur mbi shtrat. Dy duart e tij të mëdha, gjithë gunga, i kish kapur fort pas gjunjëve të mbledhur. Për ndoshta rreth një minutë, vazhdoi të rrinte ashtu krejt palëvizur, i tensionuar, duke mbajtur vesh. Pastaj befas psherëtiu, shtriqi gjymtyrët e u ngrit, dhe ashtu kaba e i ngathët, me atë kokë aq të madhe, krahët tepër të gjatë e gjoksin e zgavruar, nisi të ecte nëpër qeli.

Fytyra s'i shprehte asgjë, në mos një mendje të topitur e të zbrazët, trullosje, apo ndoshta dhe një lloj pandjeshmërie jo njerëzore. Megjithatë, përpara se të arrinte te dera me sythin e mbyllur, ai tundi grushtin drejt njërit prej mureve.

Mbi autorin

Georges Simenon (1903-1989), shkrimtar belg i gjuhës frënge; autor i një numri mjaft të madh romanesh e novelash, por që njihet kryesisht për serinë e romaneve që kanë për protagonist komisarin Megre të policisë franceze.

I përkthyer në 47 gjuhë të botës (me mbi 3.500 përkthime), është një ndër shkrimtarët më të lexuar të të gjitha kohërave, duke u renditur i treti ndër shkrimtarët e gjuhës frënge, vetëm pas Zhyl Vernit dhe Aleksandër Dymasë, dhe i gjashtëmbëdhjeti (sipas Index Translationum të botuar nga UNESCO), në botë. Në mbarë botën janë shitur më se 700 milion kopje të librave të tij.