Titulli: Bukë me sallam
Origjinali: Ham on Rye
Gjinia: Roman
Autori: Charles Bukowski
Shqipëroi: Iris Sojli
Shtëpia botuese: Pegi
Viti: 2015
Fq. 360
Pesha: 0.391 kg.
ISBN: 978-9928-200-33-4
Mbi librin
"Bukë me sallam", romani i katërt i Charles Bukowski – t, botuar për herë të parë më 1982, me gjasë është libri më autobiografik, rrëqethës dhe prekës i tij. Ai trajton fëmijërinë dhe adoleshencën e Henri Çinaskit, plot shëmti, dhembje, arrati e vetmi, që nga vitet e para të jetës e deri në kurorëzimin e një "karriere" të gjatë e të suksesshme alkoolike. "Bukë me sallam" është padyshim romani më i mirë i Bukowski – t.
Në këtë roman të ashpër, mizor e të dëshpëruar, por edhe ironik e moskokëçarës, gjithçka përballohet me tone të egra, pa gjetur asnjë ngushëllim. Aty rrëfehet për prindër patetikë, konformistë e të dhunshëm; për zbulimin vuajerist të seksit e për vetëdijen e thekshme të të qenit i përjashtuar; për revoltën kundër hipokrizive sociale të punës, të suksesit dhe të dashurisë për atdheun; për shkollën, ku hierarkitë shoqërorë janë të pashpresa dhe një riprodhim i së shkuarës; për profesorët groteskë dhe të frustruar dhe mësueset joshëse e mëmësore; për miqtë dhe rivalitetet e egra për të prirë "kopenë" e për të rregulluar ndonjë vajzë; e më së fundi, për ndjenjën poshtëruese të përjashtimit që shfaqet në dorëzimin ndaj alkoolit, së cilës vetëm shfryrja te shkrimi i dëshpëruar e kompulsiv do t'i japë një shpresë për shpagim.
Fragment nga libri
Problemi ishte se vazhdimisht duhej të zgjidhje mes dy të këqijave, dhe pavarësisht se ç'zgjedhje bëje, të rrëmbehej edhe një pjesë tjetër nga vetja, derisa nuk mbetej më asgjë. Në moshën njëzetepesëvjeçare, shumica e njerëzve kishin marrë fund.
Një komb i tërë shkërdhatash që ngisnin makina, hanin, pillnin kalamaj, bënin gjithçka në mënyrën më të tmerrshme, si për shembull, votonin për president kandidatin që u kujtonte më shumë vetveten.
Komente mbi librin
"Vulgar e megjithatë lirik, me raste zbavitës dhe pafundësisht i trishtë, Charles Bukowski vazhdon ta çbëjë pak nga pak botën dhe vetveten dhe, për herë të parë, fillojmë të shohim burimin e gjithë këtij zemërimi."
San Francisco Chronicle
"Roman i fuqishëm dhe, aty ku duhet, jashtëzakonisht zbavitës."
Sunday Telegraph
"Shpeshherë argëtues dhe gjithmonë i trishtë, "Bukë me sallam" është shkruar në një stil të ashpër, të zhveshur dhe të gjallët që e bën të admirueshëm këtë roman."
Times Literary Supplement
"Në një epokë konformizmi, Bukowski shkroi për ata që ishin siç askush nuk do të donte të ishte: të shëmtuarit, egoistët, të vetmuarit, të çmendurit."
Observer
"Në "Bukë me sallam", ai pati rolin e një udhëzuesi në makthin e personalitetit të tij, duke shkruar me një gjuhë të fortë e të drejtpërdrejtë."
The New York Times
Mbi autorin
Charles Bukowski ishte shkrimtari legjendar kalifornian, që u bë i famshëm për veprat e tij gjysmë – autobiografike për jetën e shtresave të ulëta amerikane. Ai botoi më shumë se dyzet e pesë libra në prozë dhe poezi. Romanet si "Factotum", "Bukë me sallam" dhe "Post Office" e bënë këtë alkoolik të përhershëm, e dikur edhe endacak, një shkrimtar të famshëm e të pasur.
