Mbi televizionin, Pierre Bourdieu

Titulli: Mbi televizionin
Origjinali: Sur la télévision
Gjinia: Filozofi
Autori: Pierre Bourdieu
Shqipëroi: Dilfirus Vrioni
Shtëpia botuese: Pika pa sipërfaqe
Viti: 2015
Fq. 132
Pesha: 0.142 kg.
ISBN: 978-9928-185-17-4

Koment nga autori

Kam zgjedhur t'i paraqes në televizion këto dy leksione, duke u përpjekur të arrij përtej kufijve të publikut të zakonshëm që ka në një kurs të College de France. Unë mendoj në fakt se televizioni, përmes mekanizmave të ndryshme që kam munduar t'i shpjegoj me shpejtësi – sepse një analizë më e thellë dhe më sistematike do të kishte marrë më shumë kohë – paraqet një rrezik shumë të madh për sferat e prodhimit kulturor, artin, letërsinë, shkencën, filozofinë, drejtësinë; madje besoj edhe se përkundër asaj që mendojnë e që thonë qoftë dhe gazetarët më të ndërgjegjshëm për përgjegjësinë e tyre, të cilët padyshim se janë në mirëbesim, televizioni mbetet një kërcënim aspak më i vogël edhe për jetën politike dhe për demokracinë.

Këtë mund t'ua dëshmoja lehtë duke analizuar trajtimet që televizioni i ndjekur nga një pjesë e shtypit, të shtyrë nga dëshira për të kapur audiencën më të lartë, i bëjnë për shembull nxitësve dhe propozuesve të akteve ksenofobe dhe raciste, ose duke treguar lëshimet që bëhen përditë ndaj një perspektive ngushtësisht nacionale, për të mos thënë nacionaliste, të politikës.

Dhe për ata që vënë në dyshim këto që them duke menduar se janë karakteristika thjesht franceze, do të sillja në kujtesë, mes mijëra patologjive të televizionit amerikan, trajtimin mediatik të procesit të O. J. Simpson, apo në një rast më të vonshëm, ndërtimin e një rasti të thjeshtë vrasjeje si një "krim seksual", gjë që solli një zinxhir pasojash juridike të pakontrollueshme.