Titulli: Autobusi i drithërimave, libri i parë
Origjinali: De Griezelbus 1
Gjinia: Roman
Autori: Paul van Loon
Shqipëroi:Ilira Shurbani
Shtëpia botuese: Dituria
Viti: 2019
Fq. 168
Pesha: 0.268 kg.
ISBN: 978-9928-292-08-7
Mbi librin
Nëse po kërkoni një libër që ju emocionon, ju mban frymën pezull dhe ndonjëherë ju drithëron, ky libër është për ju. Gjatë Javës së Librit për fëmijë, një shkrimtar i famshëm fton një mësues me klasën e tij për të bërë një ekskursion të veçantë me Autobusin e Drithërimave.
Ky Autobus është një shpikje e zotit Onoval, shkrimtarit. Automjeti është i vjetër, por ecën ende për bukuri. Shumë shkolla fillore janë ftuar të bëjnë ekskursione me të. Gjatë udhëtimit, shkrimtari lexon tregime nga libri i tij më i ri. Ai ka përpara vetes edhe disa objekte: një skelet, një kavanoz…
Autobusi bën përpara nëpër natë, i drejtuar nga një shofer që e ka të mbuluar fytyrën me një maskë. Në fillim tregimet duken të pabesueshme, si rrëfimi për skeletin që lëviz e jeton si njeri i gjallë, apo tregimi për dymbëdhjetë gishtërinjtë e njeriut, por shumë ngjarje dhe rastësi të vogla që ndodhin në autobus, u shkaktojnë dyshime fëmijëve dhe mësuesit.
Ndërsa udhëtimi vazhdon, duket se dikush në autobus fsheh një sekret të keq. Apo janë më shumë ata që fshehin diçka?
Koment nga autori
Shpresoj që këto tregime t’ju kenë rrëqethur në mënyrë të këndshme. Edhe për mua ishte kënaqësi që t’i shkruaja. Unë shkruaj gjithmonë natën, kur të gjithë flenë dhe duhet t’ju them, me zemër në dorë, se ndonjëherë, duke punuar për Autobusin e Drithërimave, më vinin ca mendime të çuditshme.
Për shembull, që dora e akullt e një skeleti mund të më kapte për zverku. Ose që papritmas, pas dritares sime, do të dilte nga errësira e natës fytyra e kapitenit Mordekai...
Pastaj kujtohesha që ato tregime i kisha shpikur vetë. Pra, të gjitha fantazi. Dhe, siç thotë Mishieli në fund të librit, shkrimtarët gënjejnë gjithmonë, prandaj mua nuk mund të më ndodhë asgjë dhe as juve!
Fragment nga libri
- Fëmijë, në makinë! Autobusi i Drithërimave është gati për t’u nisur.
Morisi, mësuesi, rreh shuplakat e duarve pranë hyrjes së autobusit të madh, të parkuar përpara shkollës. Pjesa e jashtme e autobusit është e pikturuar me figura fantazmash, skeletesh dhe personazhesh të tjera. Në anë, është shkruar me shkronja të mëdha: Autobusi i Drithërimave.
Nxënësit i afrohen makinës, paksa ngurrues. Në këmbë përpara shkollës, prindërit e tyre, të shqetësuar, tundin duart në shenjë përshëndetjeje. Është ora gjashtë e pasdites dhe po fillon të erret.
- Me siguri, do të jenë në shtëpi rreth orës nëntë,- thotë babai i Jorisit dhe i Pitërit.
Mësuesi e përshëndet edhe atë, me një gjest inkurajues. - Mos u bëni merak. Në orën nëntë do të jemi këtu përpara shkollës.
Sandëri dhe Mishieli janë të parët ne rresht dhe menjëherë pas tyre vijnë Anabela dhe vogëlushja Lizëlor, me çantën që s'i shqitet kurrë.
Të gjithë qeshin nën hundë, paksa të frikësuar. Me rastin e javës së librit për fëmijë, ata po nisen në një ekskursion ndryshe nga të tjerët. Një ekskursion me Autobusin e Drithërimave. Me në krye mësues Morisin, e gjithë klasa e pestë e shkollës fillore “Tulipani”, merr pjesë.
Autobusi i Drithërimave është një shpikje e zotit Onoval, shkrimtar i famshëm i librave për fëmijë. Ai mori me qira nga një shoqëri transporti një autobus të vjetër, me të cilin të përshkonte të gjithë rajonin, gjatë javës së librit.
Automjeti është copë-copë, por ecën ende për bukuri. Shumë shkolla fillore, midis të cilave “Tulipani”, janë ftuar të bëjnë një ekskursion me Autobusin e Drithërimave.
