Titulli: Apokrifet
Origjinali: Apokrifet
Gjinia: Ungjilli
Shqipëroi: Shpëtim Kelmendi
Shtëpia botuese: Zenit
Viti: 2022
Fq. 256
Pesha: 0. 372 kg
ISBN: 978-9928-293-26-8
Ky libër është në gjuhën shqipe
Mbi librin
Zbulimi, më 1945, pranë qytetit të Nag Hamadit, në Egjiptin e Sipërm, i një koleksioni tekstesh të hershme të krishtera (e ashtuquajtura ‘Biblioteka e Nag Hamadit’, ‘Dorëshkrimet e Kenoboskionit’ a ‘Ungjijtë gnostikë’), përtëriu, në mes të shek. XX, interesin e specialistëve për një prej rrymave më interesante të Krishtërimit të hershëm, Gnosticizmin. Këto dhe zbulimi, dy vite më vonë, në Kumran, i Dorëshkrimeve të Detit të Vdekur, përbëjnë ndoshta zbulimet më të rëndësishme të arkeologjisë biblike të të gjitha kohërave.
Që prej asaj kohe është bërë një punë e jashtëzakonshme për sistemimin, restaurimin, studimin, interpretimin dhe përkthimin e tyre në të gjitha gjuhët e mëdha të botës. Ndaj përkthimi nga Shpëtim Kelmendi dhe botimi i një pjese të rëndësishme të tyre në shqip, duhet kremtuar si një ngjarje e shënuar. Sepse shqipja, pas asaj furie të çuditshme ikonoklaste, që gërryeu seriozisht fuqinë abstraguese të saj, ka nevojë të ngutshme të ripërtërijë metafizikën e vet. A nuk ju duket se hapja ndaj një realiteti të shenjtëruar nga prania e Krishtit është një nisje e mbarë? Nuk ka rëndësi që ky Krisht (në të vërtetë, Krishtër, meqenëse ka aq Krishtër sa ç’ka dhe ungjij) është dëbuar nga kanoni: duke qenë se rron në gjuhë, Ai (Ata), që erdhi për të shëlbuar, është i shëlbuar përgjithnjë nëpërmjet gjuhës.
Botimi që keni ndër duar, përmbledh në një vëllim të vetëm disa prej teksteve më të rëndësishme apokrife të Besëlidhjes së Re, të cilat mund t’i grupojmë në disa zhanre: ‘ungjijtë gnostikë’ (Ungjilli i Tomës, Ungjilli i Maries, Ungjilli i së vërtetës, Ungjilli i Judës dhe Ungjilli i Filipit), ‘ungjijtë e fëmijërisë’ (Protoungjilli i Jakobit dhe Ungjilli i Pseudo Mateut), ‘cikli i Pilatit’ (Letër e Pilatit drejtuar Herodit, Letër e Herodit drejtuar Pilatit, Letër e Ponc Pilatit drejtuar Tiberit, Letër e Tiberit drejtuar Pilatit) etj.
