Procesi, Franc Kafka

Titulli: Procesi (kopertinë e trashë)
Origjinali: Der Prozess
Gjinia: Roman
Autori: Franc Kafka
Shqipëroi: Gjergj Vlashi
Shtëpia botuese: Koha Ditore
Viti: 2005
Fq. 192
Pesha: 0.275 kg
ISBN: 84-9789-987-3

Mbi librin

Është ky një rrëfim emblematik i shekullit që ka krijuar totalitarizma monstruoze. "Ata" vijnë ta marrin njeriun e shpërfytyruar, i cili e ka humbur gjithë fuqinë e kryengritjes, e cila është edhe vetë jeta, dhe e marrin me vete. Nuk janë me rëndësi faji, drejtësia: me rëndësi është vetëm procesi.

Duke krijuar rrëfimin për Jozef K., Kafka duket se ka shkruar njërën nga diagnozat më të rënda të shoqërisë moderne, një koncept totalitar që gëlltit individin si të tillë, ia anulon atij autenticitetin ekzistencialist. Nuk ka dyshim se vizioni i pakëndshëm i Kafkës edhe sot e ka peshën e vet funksionale dhe rëndësinë e vërejtjes.

Fragment nga libri

Me gjasë, dikush kishte shpifur kundër Jozef K., sepse një mëngjes atë e arrestuan, megjithëse s'kishte bërë gjë. Gjellëbërësja e zonjës Grubah, pronarja e shtëpisë, e cila për çdo ditë ia çonte sillën në dhomë, atë mëngjes nuk u duk. Dhe kjo ndodhte për herë të parë.

K. priti një grimëherë i mbështetur te nënkresa dhe këqyri plakën që banonte përballë. Ajo po e vështronte me kërshëri të madhe; i habitur e njëherësh edhe i uritur, ai i ra ziles. Atë hop trokëllitën e në dhomë hyri një burrë, të cilin s'e kishte parë ndonjëherë.

Ishte shtatlartë, hijerëndë, i veshur me një kostum të zi, ngjante sikur gatitej të ndërmerrte ndonjë udhëtim; binin në sy tegela, stringla, xhepa e një rrip, që e bënte kostumin të dukej shumë praktik, megjithëse nuk merrej vesh përse hynin në punë gjithë ato gjëra.
-Kush jeni ju? – e pyeti K. dhe u çua ndenjur mbi shtrat.

Mbi autorin

Franc Kafka (1883 – 1924), një hebre nga Praga, është njëri nga krijuesit e prozës moderne dhe interpretuesit më pesimistë të fatit të njeriut. Ai është rritur me të atin autoritar dhe pjesën më të madhe të jetës është marrë me punë të mërzitshme administrative. Me një personalitet të thyeshëm psikologjik, në shkrime ai gjen një lloj azili.

Përveç "Procesit", ai është autori i librave: "Kurthi", "Amerika" dhe i një numri të madh novelash, prej të cilave "Metamorfoza", rrëfim për fatin e nëpunësit Gregor Samsa bën pjesë ndër historitë më të rëndësishme të shekullit XX.

Megjithatë, pak para vdekjes, i sëmurë dhe i dëshpëruar, ai kërkonte nga miku i tij, Maks Brodi, po ashtu shkrimtar, që t'i djegë të gjitha dorëshkrimet e tij. Për fat të letërsisë botërore, miku nuk e dëgjoi.