Titulli: Lindja e Britanisë, vëllimi i dytë
Origjinali: A history of the english speaking peoples
Gjinia: Histori
Autori: Winston S. Churchill
Shqipëroi: Fatmir Dibra
Shtëpia botuese: Fan Noli
Viti: 2006
Fq. 300
Pesha: 0.438 kg.
ISBN: 978-99943-831-4-0
Fragment nga libri
Dhe ja, në këtë vend të shkretuar u shfaq engjëlli i shpëtimit, mbrojtësja më fisnike e Francës, më e shkëlqyera mes heronjve, më e adhuruara prej gjithë shenjtëve të saj, kujtimet për të cilën për një kohë të gjatë kanë frymëzuar francezët, virgjëresha – fshatarë, e mrekullueshmja Zhana D'Ark.
Në fshatin e largët dhe të varfër Dompremi, në fund të pyllit Vohez, ajo shërbente në hanin për udhëtarët e rastit. Këmbëzbathur, ajo i dërgonte për të pirë ujë kuajt që u përkisnin udhëtarëve që kalonin atje. Të dielave ajo bridhte nëpër pyll ku ndodheshin vende te shenjta dhe prej atje, ashtu siç tregohet në legjendë, duhej të vinte njeriu që ishte caktuar për të shpëtuar Francën.
Në fusha ku ajo kulloste bagëtitë, shikimit të saj të brendshëm iu shfaqën të dërguarit e Zotit, të mërzitur nga fatkeqësitë e Francës. Vetë shenjti Mihal e mësoi të vihej në krye të ushtrisë çlirimtare. Në fillim, Zhana iu frikësua një përgjegjësie aq të madhe, por kur ai u kthye i shoqëruar nga shenjtëresha Margarita dhe Shenjtëresha Ekaterina, mbrojtëset e kishës së fshatit, vajza iu nënshtrua urdhrit të tyre.
Zemra e virgjëreshës u mbush tërë mëshirë ndaj mbretërisë së Francës dhe ndoshta kjo ndjenjë e lartë dhe e bukur në njëfarë mënyre e bëri atë të pamposhtur.
