Titulli: Tridhjetë e gjashtë skemat strategjike dhe taktike (kopertinë e trashë)
Gjinia: Histori, arti ushtarak
Shtëpia botuese: Onufri
Viti: 2014
Fq. 152
Pesha: 0.376 kg
ISBN: 978-9928-164-99-5
Mbi librin
"Tridhjetë e gjashtë skemat strategjike dhe taktike" është një libër i famshëm mbi artin ushtarak të lashtësisë, i zbuluar në vitet '40 të shekullit të 20 – të, i vlerësuar po ashtu si libri "Arti ushtarak" i Sun Zu – së, një vepër e lashtë kineze me famë botërore mbi strategjitë dhe taktikat ushtarake.
Mendimet e shtjelluara në librin "Tridhjetë e gjashtë skemat strategjike dhe taktike" janë vënë në zbatim në fushën politike, diplomatike, ekonomike dhe tekniko – shkencore. Në këtë libër rëndësi nuk i kushtohet shtjellimit të teorisë ushtarake, por zbatimit praktik të strategjisë ushtarake.
Në të shprehet mendimi se përballë situatës në betejën e luftës, që ka paqartësi të shumta dhe që ndryshon në çdo çast, gjëja më e rëndësishme për fitoren mbi armikun është që të bëhet shpejt gjykimi i saktë dhe të merret masë e drejtë përballuese.
Në këtë vepër, mendimet strategjike dhe taktike të Kinës së Lashtë përmblidhen shkurtimisht në 36 skema betejash dhe secila prej tyre tregon qëllimin e qartë dhe zbatimin praktik. Ndër to ka më shumë dredhi të fshehta, të çuditshme, të ndryshueshme dhe të papërfytyrueshme.
Në këtë libër, skemat strategjike dhe taktike janë emërtuar me idioma dhe fjalë të urta të gjuhës kineze, që përdoren dendur në pjesët teatrore dhe romanet kineze. Në këtë libër, me një gjuhë të kuptueshme dhe me shembuj tipikë të luftës ose të jetës së përditshme, shpjegohen të fshehtat e këtyre skemave. Përshkrimet janë interesante, të sakta dhe të kuptueshme, prandaj ai u pëlqen shumë lexuesve.
Të marrim për shembull skemën e 18 – të me emrin "Qin Zei Qin Wang", që do të thotë se për të kapur hajdutët, duhet të kapësh në radhë të parë kreun e tyre. Në këtë skemë shprehet mendimi se në betejë po të kapësh komandantin e trupave kundërshtare, ke siguruar fitoren sepse në këtë rast kundërshtari pështjellohet.
Skema e 36 – të quhet "Zou wei shang ji", që do të thotë se në rrethanat e pafavorshme përballë armikut të fuqishëm, taktika më e mirë është tërheqja që të ruhen forcat e gjalla. Për arsye të përmbajtjes së kuptueshme, libri "Tridhjetë e gjashtë skemat strategjike dhe taktike" tërheq edhe sot vëmendjen e shtresave të ndryshme shoqërore dhe quhet "arti strategjik i masave".
Vlera e tij është shtrirë në fusha të shumta të jetës shoqërore, madje kanë dalë mjaft botime të tjera më të njëjtin titull. Ky libër është përhapur fillimisht në Japoni, duke u quajtur "Dredhitë për marrjen e vendimeve në komandë" dhe tani është përkthyer e botuar në gjuhë të shumta, si në gjuhën holandeze, italiane, angleze, franceze, ruse, portugeze, spanjolle, turke etj.
Një gjeneral francez i quajtur Lakost botoi dikur një artikull për t'i njohur lexuesit me këtë libër, duke e quajtur atë "enciklopedi e vogël" dhe duke e përshkruar në mënyrë të figurshme si "labirinti në rrugën e dredhive". Sidoqoftë, më shumë sesa këshilla se si të fitosh, këto 36 skema strategjike mund të shihen si fjalë të urta: ato janë vëzhgime e përfundime mbi jetën e përditshme pavarësisht në kohë lufte apo paqeje.
Bota e sotme po bëhet gjithnjë e më e ndërvarur, prandaj është shtuar edhe nevoja që popujt e vendeve të ndryshme ta njohin sa më mirë historinë, kulturën, mendësinë, doket dhe zakonet e njëri – tjetrit, për të shtuar mirëkuptimin e ndërsjellë dhe për të krijuar marrëdhënie sa më harmonike mes tyre.
Për ta bërë edhe më të njohur te publiku shqiptar një prej qytetërimeve më të vjetra, më të pasura e më të veçanta në botë, siç është ai kinez, CRI Shqip në bashkëpunim me shtëpinë botuese "Onufri", botojnë serinë e librave për historinë dhe kulturën kineze.
Kjo seri përbëhet nga katër libra: "Tregime dhe legjenda kineze", "Tridhjetë e gjashtë skemat strategjike dhe taktike", "Figura të historisë kineze" dhe "Idioma kineze".
