Historia e fshehte e kapitalizmit italian, Cesare Romiti, Paolo Madron

Titulli: Historia e fshehtë e kapitalizmit italian
Gjinia: Histori, ekonomi
Autori: Cesare Romiti, Paolo Madron
Shtëpia botuese: Saras
Viti: 2012
Fq. 264
Pesha: 0.331 kg
ISBN: 978-9928-152-02-2

Mbi librin

Cesare Romiti ka përshkuar 50 vjet të historisë italiane. Këtë e ka bërë jo vetëm si menaxher, administrator i deleguar dhe president i Fiatit në fillim dhe president i Rcs-së më pas, por edhe si protagonist i një sistemi që bashkonte financën, kapitalizmin e familjeve të mëdha dhe politikën, në një ndërthurje që ka prodhuar njëkohësisht fryte të virtytshme dhe të këqija.

Një sistem të cilin Romiti e ka mishëruar përsosurisht, edhe sepse ka qenë për 24 vjet me radhë përfaqësuesi i industrisë së parë dhe më aristokrate italiane, një rol që e lejonte të luante në të gjithë fushën edhe jashtë kangjellave të tij. Kështu, edhe për shkak të lidhjes shumë të ngushtë me Mediobanca-n e Enrico Cuccia-s, nuk ka pasur ndonjë operacion të madh, ku nuk ka qenë i pranishëm, apo personazh të jetës publike me të cilin nuk ka pasur të bëjë.

Duke bashkuar aftësitë e padiskutueshme profesionale, vendosmërinë e madhe dhe një ndjenjë të lindur të pushtetit, Romiti ka qenë krijuesi i një figure të re, asaj të menaxherit-padron që i pajisur me një mandat të fortë nga ana e aksionerëve, e administronte ndërmarrjen në autonomi të plotë dhe e përfaqësonte në tryezat e politikës dhe të ballafaqimit midis palëve shoqërore.

Nga Gianni Agnelli te De Benedetti, nga terrorizmi te Duart e Pastra, nga Republika e Parë te Berlusconi, shumë ngjarje dhe personalitete të rëndësishme të historisë së vonë italiane janë të ndërthurura ngushtë me biografinë e tij.

Në këtë libër Romiti i bën Paolo Madronit një rrëfim të kthjellët dhe herë pas here të pamëshirshëm, që duke ripërshkuar fillin e kujtimeve na lejon t'i lexojmë nën një dritë të re 50 vitet e fundit të kapitalizmit italian në mënyrë që të rimarrim hovet pozitive duke shmangur gabimet e bëra gjatë rrugës.

Fragment nga libri

"Në shtëpinë e Caterina Caselli-t ishim unë, Craxi, Berlusconi dhe Montezemolo-ja. Craxi ishte i fuqishëm ndërkaq dhe më kujtohet që Berlusconi, asokohe tërësisht jashtë politikës, sapo kishte përfunduar Milanon 2 dhe po fillonte të kishte njëfarë interesi të ndrojtur për televizionin.

Sekretari socialist, që kishte dëshirë të bënte shaka, në njëfarë pike, duke m'u drejtuar mua, por duke treguar Kavalierin dhe Montezemolo-n, tha: "Dëgjoni, Romiti, ju duhet të më thoni një gjë: kush nga këta të dy është më gënjeshtari? Se që janë gënjeshtarë dihet, por ju që i njihni më mirë se unë ndoshta mund të më ndihmoni ta zgjidh dyshimin".

Më kapi në befasi, pastaj ia hodha me një batutë: "Jam në një mendje me ju që janë dy gënjeshtarë të mëdhenj, por nëse provojmë të hedhim një monedhë në ajër, jam i bindur që duke rënë do të qëndronte drejt"."

Mbi autorët

Cesare Romiti (1923), një nga drejtuesit më të rëndësishëm italianë të ndërmarrjeve, në 1970-ën u bë drejtor i përgjithshëm dhe administrator i deleguar i Alitalia-s. Në 1973-shin hyri te Fiat-i, duke u bërë më pas administrator i deleguar dhe president i tij. Pas daljes nga Fiat-i, qe president i Rcs-së nga 1998-a deri në 2004-ën, dhe i shoqërisë së ndërtimeve e inxhinierisë Impregilo, nga 2005-a deri në 2007-ën. Në 2004-ën themeloi Fondacionin Itali-Kinë, që e kryeson dhe që mbledh dhjetra personalitete të sipërmarrjes, ministritë kryesore italiane si edhe shumë ndërmarrje të interesuara për tregun kinez.

Paolo Madron (1956) ka qenë korrespondent nga Nju Jorku i "Milano Finanza"-s, zëvendësdrejtor i "Panorama"-s, bashkëpunëtor i "Foglio"-s, editorialist i "Il Giornale"-s, drejtor dhe themelues i së përjavshmes "Panorama Economy", editorialist dhe i dërguar i "Sole 24 Ore"-s. Në 2010-ën themeloi të përditshmen on line "Lettera43", të cilën e drejton aktualisht. Me Longanesi-n ka botuar "Jepini Çezarit" (1998), "Nëntë zero" (2001), "Ana e dobët e pushteteve të forta" (2005).