Ese mbi parimin e popullsise, Thomas Maltus

Titulli: Ese mbi parimin e popullsisë
Origjinali: An essay on the Principle of Population
Gjinia: Ekonomi
Autori: Thomas Maltus
Shqipëroi: Alfred Cako
Shtëpia botuese: Helga's Secrets
Viti: 2010
Fq. 176
Pesha: 0.225 kg
ISBN: 978-99956-816-0-9

Fragment nga libri

Mendoj se me të drejtë mund të them dy postulate. I pari, ushqimi është i nevojshëm për ekzistencën e njeriut. I dyti, pasioni midis sekseve është i nevojshëm dhe do të mbetet pothuajse në gjendjen aktuale. Duke marrë popullsinë e botës në çfarëdo numri, një mijë milion, për shembull, qenia njerëzore do të rritej në progresion -1, 2, 4, 8, 16, 32, 64, 128, 256 etj. dhe mjetet e jetesës me -1, 2, 3, 4 etj.

Në dy shekuj e një çerek raporti i popullsisë me mjetet e jetesës do të ishte 512 me 10; në tre shekuj do të ishte 4096 me 13, dhe në dy mijë vjet diferenca do të ishte pothuaj e pallogaritshme, megjithëse prodhimi në atë kohë do të ishte në një nivel shumë më të lartë nga ky i sotmi.

Asnjë lloj kufizimi mbi prodhimet në tokë nuk është vendosur; ato mund të rriten përgjithmonë dhe të jenë më tepër se çdo sasi e parashikuar, por deri tani është pozimi i forcës së popullsisë si një forcë e një rendi më të lartë dhe shtimi i species njerëzore mund të mbahet në përpjestim të drejtë me rritjen e mjeteve të jetesës vetëm nëpërmjet veprimit të vazhdueshëm të ligjit të fortë të nevojës që vepron si një kontroll me forcën më të madhe. Pasojat e këtij kontrolli janë për t'u vlerësuar.

Forca superiore e popullsisë nuk mund të kontrollohet pa prodhuar mjerim ose vese dhe tepria e këtyre dy përbërësve të hidhur në kupën e jetës njerëzore, si dhe vazhdimësia e shkaqeve fizike që duket se i kanë prodhuar ato, mbartin një dëshmi bindëse.

Mbi librin

Ky libër u drejtohet jo vetëm politikanëve, ekonomistëve, sociologëve, adhuruesve të filozofisë dhe besimtarëve të të gjitha feve, por edhe sekularistëve dhe ateistëve. Të gjitha shpjegimet e autorit në mbështetje të virtytit, besimit te Zoti, pronës private, lirisë ekonomike të kontrolluar dhe të gjitha kundërshtimet e tij ndaj vesit, mosbesimit në Zot, pronës së përbashkët dhe barazisë në pasuri, gjenden në faqet e këtij libri.

Çdo arsyetim i tij vjen nga të kuptuarit e thellë që ai ka për ligjin e nevojës që lidh numrin e popullsisë me mjetet e saj të kërkuara të jetesës. Sa herë që ky parim epror i natyrës është shkelur, botën e ka pllakosur mjerimi dhe vesi. Dëshira për t'u arratisur prej tyre, i ka shtyrë popujt në luftra.

Nuk ka qenë në thelb, aq e vërtetë etja për lavdi e gjeneralëve dhe prijësave ushtarakë në histori, ajo që ia ka shtyrë ata drejt sipërmarrjeve të mëdha ushtarake, thotë autori, sesa ka qenë i tillë ngacmimi i popujve për nevojën e nginjies së këtij balancimi që kërkon ligji natyror i popullsisë.