Titulli: Pesë ditët e fundit të profetit
Origjinali: Peygamberin Son Beş Günü
Gjinia: Roman
Autori: Tahsin Yücel
Shqipëroi: Lindita Xhanari (Latifi)
Shtëpia botuese: Fan Noli
Viti: 2018
Fq. 320
Pesha: 0.409 kg.
ISBN: 978-9928-251-72-5
Fragment nga libri
“Po jetoj një ëndërr brenda ëndrrës! Kjo vetëm kështu mund të jetë?” Pastaj, duke qenë i bindur se ishte në thellësitë e një ëndrre, u kthye nga ana tjetër. Me t’u kthyer, trupi i tij gati vetvetiu u bashkua me trupin që ndodhej mbi të duke filluar nga pika më e ndjeshme.
Edhe pse sytë i mbante mbyllur, iu duk sikur po rrëshqiste në një bardhësi të pafund, po ndiente një kënaqësi të njëjtë me atë që kishte ndjerë shumë vjet më parë. Ashtu si atëherë, kënaqësia iu përhap në të gjithë trupin, deri në gjak, deri në palcë, deri në majë të gishtave dhe në rrënjët e flokëve, mbushi gjithë poret e trupit si uji që rrjedh nga Herakliti.
Ai ndjeu dridhjet e kënaqësisë si i magjepsur, pa lëvizur, pa marrë frymë, sikur dëgjonte një melodi të paarritshme, e cila buronte që nga thellësia e trupit dhe e kthente në kënaqësi gjithçka që po përjetonte dhe ëndërronte; ndërkohë që melodia vazhdonte pa lezet, ai dëshironte të merrte pjesë edhe vetë në këtë harmoni të paparë, si dëgjues i thjeshtë, pa u diktuar, me ndrojtje dhe po lëvizte kokën dhe këmbët që të bashkohej me atë harmoni lëvizjesh.
