Titulli: Eliksiri i dashurisë
Origjinali: L'Élixir d'amour
Gjinia: Roman
Autori: Eric – Emmanuel Schmitt
Shqipëroi: Edit Dibra
Shtëpia botuese: Toena
Viti: 2016
Fq. 144
Pesha: 0.201 kg.
ISBN: 978-9928-205-61-2
Mbi librin
A është dashuria një proces fizik, kimik, një pleksje molekulash që mund të krijohet me mjete shkencore? Apo është një mrekulli shpirtërore? A ekziston një mjet që ta shpërthejë pasionin, ashtu si dikur eliksiri bashkoi çiftin e të rinjve Tristanin dhe Izoldën? A jemi krejtësisht të lirë të dashurojmë?
Adami dhe Luiza, ish-të dashur, jetojnë tashmë me mijëra kilometra larg njëri-tjetrit. Ai në Paris, ajo në Monreal. Përmes këmbimit të letrave, duke kujtuar lëndimet e së shkuarës dhe duke i pohuar njëri-tjetrit aventurat e reja të tyre, ata hidhen në një sfidë: të provokojnë dashurinë. Por, a fshihet ndonjë kurth pas kësaj loje?
Vëzhgues i mirë i trilleve të zemrës, Eric-Emmanuel Schmitt eksploron misterin e joshjeve dhe të ndjenjave.
Fragment nga libri
I dashur Adam,
Atëherë po e bëj pyetjen ndryshe: a jemi të lirë të biem në dashuri me filanin apo fistekun?
A zgjedhim?
A na zgjedhin?
Kur të njoha ty Adam, ishte dashuri me shikim të parë. "Ky është ai!" ulëritën shqisat dhe mendja ime. Muajt e fundit dola në përfundimin që shqisat dhe mendja ime e kishin humbur gjykimin, sepse ne u ndamë në krye të pesë vjetëve.
Tani pyes veten: "Vërtet gabohesha kaq shumë?"... E vdesim dashurinë duke dashur ta bëjmë të përjetshme. Më mirë ta shijojmë kur e kemi, kjo dhuratë mjafton. Lumturia s'mund të jetë veçse e përkohshme. A na e ka vërtetuar kush të kundërtën? Në jetën e njeriut, "përgjithmonë" do të thotë gjithmonë "për pak kohë".
Luiza jote
P.S. Sa letërkëmbim i çuditshëm ky yni: nuk flasim nga dashuria, por për dashurinë.
Mbi autorin
Eric-Emmanuel Schmitt lindi në mars të vitit 1960. Kreu shkollën e mesme në Lycée du Parc në Lion të Francës dhe më pas ndoqi studimet e larta në Paris (1980-1985). Ai mban titullin Doktor në filozofi. Është dramaturg, romancier, eseist dhe kineast. Brenda një dhjetëvjeçari, Eric-Emmanuel Schmitt është bërë një nga autorët frankofonë më të lexuar e më të pranishëm në botë.
Pas sukseseve të njëpasnjëshme në teatër, ai botoi një sërë romanesh dhe përmbledhje novelash. I vlerësuar sa nga publiku po aq edhe nga kritika, pjesët e tij teatrale janë nderuar me shumë çmime "Molier" si dhe e gjithë vepra e tij teatrale është vlerësuar me "Grand Prix" (për teatrin) nga Akademia Franceze.
Schmitt-i është vlerësuar, gjithashtu, me çmimin "Goncourt" (për novela) për "Concerto à la mémoire d'un ange"; çmimin e romanit historik, "Agrippa d'Aubigné", për romanin "Gruaja në pasqyrë"; me çmimin e "Grands Espaces" për librin "Odiseja nga Bagdadi" etj. Veprat e tij janë përkthyer tashmë në 43 gjuhë të ndryshme dhe pjesët e tij teatrale luhen rregullisht në mbi 50 vende.
Në Akademinë Mbretërore të Gjuhës dhe të Letërsisë Franceze në Belgjikë, ai është ulur në kolltukun që dikur zinte Colette dhe Cocteau. Nga Toena janë sjellë në shqip edhe vepra të tjera, si: "Gruaja në pasqyrë", "Odetë Gjithkushi dhe histori të tjera" dhe "Oskari dhe zonja rozë", vlerësuar me çmimet "Prix Chromos" në Zvicër dhe "Grand Prix Etranger" në Belgjikë.
