Mos harro të më puthësh ose Zebra, Alexandre Jardin

Titulli: Mos harro të më puthësh ose Zebra
Origjinali: Le zébre
Gjinia: Roman
Autori: Alexandre Jardin
Shqipëroi: Edmond Tupja
Shtëpia botuese: Pegi
Viti: 2014
Fq. 220
Pesha: 0.234 kg
ISBN: 978-9928-4197-8-1

Mbi librin

“Mos harro të më puthësh ose Zebra” u botua për herë të parë në 1988 dhe po atë vit fitoi çmimin letrar “Femina”. Qe një nga romanet më të suksesshme të asaj periudhe dhe në vitin 1992 u ekranizua.

Gaspar Egërshani, i martuar prej 15 vjetësh me Kamilën, gëzon nofkën “Zebra”. Rutina ka zëvendësuar tashmë prej kohësh zjarrin e dashurisë së viteve të para; “çiftet vdesin nga heshtja” mendon ai. Zebrës kjo i duket e papranueshme, prandaj ai vendos ta bëjë përsëri për vete Kamilën e tij... por si?

Fragment nga libri

"Të gjithë mjaftohen duke ia fituar zemrën një femre që papritmas shfaqet në jetën e tyre. Po t’ia rifitosh zemrën gruas sate pas pesëmbëdhjetë vjetësh martese? Asnjë donzhuan imagjinar nuk do t’i futej kësaj ndërmarrjeje të rrezikshme.

Dhe pikërisht kjo e mundonte Zebrën, sepse, jo më kot Shekspiri, Stendali dhe autorët më të mëdhenj nuk kanë guxuar ta trajtojnë temën e rilindjes së dashurisë: një gjë e tillë duhet të jetë e pamundur. Kjo përsiatje i jepte Zebrës goditjen vendimtare, por ai e donte aq shumë Kamilën, saqë nuk mund të hiqte dorë nga qëllimi i tij.

Vetëm disa mënyra të jashtëzakonshme të vepruari do t’i krijonin mundësinë për t’ia dalë mbanë atje ku njerëzimi vetëm kishte dështuar, mendonte ai."

Komente mbi libri

“Realiteti nuk i pëlqen. I duket i dhimbshëm dhe zhgënjyes. Për ta duruar, ai shpik një mjet të suksesshëm, që korrigjon realitetin duke ndërtuar universe utopike: zanatin e romancierit.”

Le nouvel Economiste

“Pse zebra? Është e qartë: kjo kafshë tërheqëse, me një gëzof të vijëzuar, është e vetme, e papërsëritshme, si shenjat e gishtërinjve tanë apo si gjurmët e dhëmballëve. Dhe, për Alexandre – n, vetëm e veçanta është fisnikëri e mirëfilltë.”

Paris Match

Mbi autorin

Alexandre Jardin (1965) është një shkrimtar dhe kineast francez, që ka botuar mbi 20 romane, duke filluar që nga viti 1986. Veprat e tij janë përkthyer në dhjetëra gjuhë të botës dhe kanë ngjallur entuziazmin e lexuesve.