Titulli: Rite, doke dhe zakone të martesës në Tiranë dhe rrethinat e saj
Origjinali: Rite, doke dhe zakone të martesës në Tiranë dhe rrethinat e saj
Gjinia: Kulturë
Autori:Sabina Vaqarri
Shtëpia botuese: Iceberg
Viti: 2014
Fq. 448
Pesha: 0.555 kg.
ISBN: 978-9928-41-410-6
Koment nga autorja
Ndërmarrja e një studimi të tillë më është dukur sa interesant dhe i vlershëm, po aq i vështirë dhe me të papritura. Interesant sepse prek një temë e cila, në një rrafsh gjithëpërfshirës, është universale siç është martesa me dasmën, ritet dhe doket e saj të identifikuara në një hapësirë shënjuese e specifike (Tirana dhe rrethinat e saj).
I vlershëm sepse synon të plotësojë një tablo a mozaik ende të mangët, madje të munguar, në kuptimin e një paraqitjeje me natyrë tanimë ballore e shteruese, pa mohuar apo anashkaluar aspak studimet e kryera deri më sot mbi këtë dukuri antropologjike nga emra të nderuar të shkencës shqiptare.
I vështirë sepse duke qenë i gjerë, po aq i këqyrur në ecuri historike dinamike, më është dashur të bëj qasje, krahasime e pranëvënie të llojllojshme me tipologji të ngjashme martesash, dasmash, ritesh, dokesh e zakonesh të krahinave të tjera të vendit dhe mbarë hapësirën etnike shqiptare, sikundër të marr parasysh modelet simotra në vendet e popujt e tjerë, fqinj me ne apo më tutje.
Me të papritura sepse duke konsideruar hulumtimet e kryera prej meje rreth temës, posaçërisht ekspeditat e shumta që janë bërë më parë nga ish Instituti i Folklorit, më pas Instituti i Kulturës Popullore dhe sot nga Instituti i Antropologjisë Kulturore dhe Studimit të Arteve, jo pak ide, gjykime e vlerësime më është dashur t'i ballafaqoj me konkluzione të fundme e më të sakta, gjegjësisht një konceptimi e metodologjie më të kohës duke shmangur ose zhveshur thelbin real të dukurive nga mbivendosjet ideologjike dhe ngushtësia doktrinore.
Kjo ka ngjarë posaçërisht me mjaft studime, artikuj, kumtesa apo libra të botuara para vitit 1990, por në disa raste edhe pas vitit 1990, ku kam vënë re edhe spekulime, teprime apo keqkuptime.
