Titulli: Vajzat e ballkonit
Origjinali: Vajzat e ballkonit
Gjinia: Roman
Autori: Edmond Tupja
Shtëpia botuese: Pegi
Viti: 2014
Fq. 168
Pesha: 0.174 kg.
ISBN: 978-9928-175-34-2
Mbi librin
I cilësuar nga vetë autori si një pseudoroman, kjo është historia e dy vajzave shqiptare, produkt tipik i tranzicionit postkomunist, në përpjekje për të gjetur vetveten përmes tundimeve të shumta për të qenë diçka tjetër.
Heroinat tona jetojnë dy jetë paralele: nxënëse shembullore dhe fëmijë problematik; studente e urtë dhe kurtizane e re; artiste e lirë dhe shpirt i djallëzuar. Cila nga këto dy vajza është vetvetja? Çfarë kanë ato të përbashkët me njëra-tjetrën?
Dhe sa janë ato produkt i shoqërisë shqiptare? Këto janë pyetjet që vijnë natyrshëm teksa kthejmë faqet e këtij romani. Si në traditën më të mirë të romanit bashkëkohor, nuk gjejmë përgjigje, por vetëm pyetje të tjera.
Fragment nga libri
Zgjodha frëngjishten. Dhe, detyrimisht, më ra për pjesë të ndiqja, në vitin e fundit, leksionet e një profesori plak me emrin e personazhit kryesor të njërit prej romaneve më të njohura, edhe në Shqipëri, të një autori francez të shekullit XIX.
Një tip i çuditshëm, por mendjelirë, që kishte studiuar në Francë para gati gjysmë shekulli. Që rizgjoi tek unë, thellë në shpirt, dëshirën për të shkruar pa grisur fletët e shkruara, që të vizatoja, madje, pse jo, të pikturoja pa grisur vizatimet dhe pa prishur pikturat e mia, që t'i bija violinës edhe pa e marrë në dorë.
Me harkun e zemrës. Për t'u zhytur në një dehashpirt të paparë ndonjëherë. Dehashpirt... Këtë fjalë ma mësoi ai; sigurisht, ajo ekziston edhe në fjalorin e shqipes, por ai e bëri të prekshme për mua. Të gjithëpushtetshme.
