Të mallkuarit e ditës së gjashtë, Valter File

Titulli: Të mallkuarit e ditës së gjashtë
Origjinali: Të mallkuarit e ditës së gjashtë
Gjinia: Roman
Autori: Valter File
Shtëpia botuese: Tirana Times
Viti: 2009
Fq. 242
Pesha: 0.28 kg
ISBN: 978-99956-771-2-1

Mbi librin

Kur ta keni lexuar këtë libër do të ndjeheni të lehtësuar që ju vetë nuk jeni pjesë e botës së tij. Është një botë e largët ku në emër të pushtetit dhe sundimit çdo mizori është e justifikuar. Është një botë ku jeta do të bëjë ciklin e saj të natyrshëm të lindjes dhe të asgjësimit.

Ne jemi ndryshe dhe nuk kemi asnjë lidhje me të, nuk i përkasim as kohës dhe as hapësirës së saj. Dhe përsëri nuk kemi si të shpëtojmë nga flligështia dhe mëkati, sepse bota në fjalë është brenda nesh. Ne s'kemi qenë kurrë pjesa e saj, por ama ajo është pjesa jonë.

Fragment nga libri

Dhe ky breshër, që filloi kaq papritur, vazhdoi, pa ndërprerje tri herë nga gjashtë muaj. Gjashtë muajt e parë rrëzoi gjithçka përtokë dhe e ktheu në copa. Bimë, pemë, ndërtesa dhe gjithçka që kishte krijuar aty dora e njeriut e copëzoi. Gjashtë muajt e dytë, çfarë ishte e copëzuar u shtyp dhe u rishtyp nga grushtat e akullt, derisa u kthye në grimca fare të vogla pluhuri.

Në këtë pluhur u përzjenë të gjitha dhe askush nuk ishte në gjendje ta kuptonte, nëse aty brenda ishte gruri apo druri, krahu i mizës apo kokrra e grurit, eshtrat e njeriut apo ahkla e lisit. Dhe pas gjashtë muajve të tretë, duart e akullta e gatuan dhe e stërgatuan këtë pluhur në baltë.