Titulli: Letra e harruar
Origjinali: Das Lavandelzimmer
Gjinia: Roman
Autori: Nina George
Shqipëroi: Sabina Dhrimo
Shtëpia botuese: Pegi
Viti: 2016
Fq. 396
Pesha: 0.428 kg.
ISBN: 978-9928-200-47-1
Mbi librin
Në një barkë në brigjet e Senës, gjendet një librari lundruese e veçantë, me emrin "Farmacia Letrare". Zhan Perduja, librashitësi i saj, mendon se çdo libër është balsam për shpirtin. I vetmi njeri që, me sa duket, nuk po gjen shërim nëpërmjet letërsisë është ai vetë: prej njëzet e një vjetësh, ai jeton me kujtimin e së dashurës, e zhdukur krejt papritur duke i lënë vetëm një letër.
Një zbulim rastësor e i dhimbshëm për të dashurën e tij do ta shtyjë të lërë brigjet e Senës dhe të ndërmarrë një lundrim nëpër lumenjtë e Provansës së bukur, një udhëtim i mbushur me ngjyra, aroma e shije të paharrueshme.
Ky është një himn i mrekullueshëm për librat si dhuratë mençurie e shpëtimi, për ndjenjat e humbura e të gjetura sërish, për shpirtrat e trazuar dhe për shpresën, atë që do të mbushë zemrat e dorëzuara të secilit prej nesh.
Fragment nga libri
Miliarda vjet më parë, kur shpërthyen yjet, ra shi në formë hekuri, argjendi, ari dhe karboni, dhe hekuri i pluhurit të yjeve tani është brenda nesh. Në mitokondritë tona. Nënat ua përcjellin yjet dhe hekurin e tyre fëmijëve.
Ti dhe unë, Zhan, ku ta dish, ndoshta jemi nga pluhuri i të njëjtit yll dhe e kemi njohur njëri – tjetrin nga drita e tij. Kemi kërkuar njëri – tjetrin. Ne jemi kërkues yjesh.
Komente mbi librin
"Një libër që njëherazi ta thyen dhe ta ngroh zemrën. Proza impresionuese e Nina George – it e shoqëron lexuesin në një udhëtim jo vetëm në vendet më të bukura të Francës dhe në magjinë e librave, por në tërësinë enciklopedike të emocioneve njerëzore. "Letra e harruar" është një libër, thurja e të cilit, ngjyrat e aromat do t'ju bëjnë për vete dhe do t'ju përkundin në fuqinë shpëtimtare të dashurisë."
Charlie Lovett, shkrimtar
"Një testament për dashurinë – e humbur, e kërkuar e të gjetur – dhe fuqinë shëruese të librave; për tangon dhe për Provansën."
Susan Voake, Norwich Bookstore
"Libri Numër Një që duhet lexuar!"
The Indipendent
Mbi autoren
Nina George (1973) është shkrimtare gjermane, e mirënjohur për romanin e saj më të shitur "Letra e harruar", përkthyer në 28 gjuhë. Ajo ka shkruar edhe 26 romane të tjera dhe ka punuar si gazetare e kronikës kriminalistike e redaktore përgjegjëse për një sërë gazetash të njohura gjermane. Në vitet 2012 dhe 2013, ka fituar çmimet DeLiA dhe Friedrich Glauser, çmimi për romanin më të mirë policor në Gjermani.
