Kuptimi metafizik dhe dialektik i lëvizjes, Robert Thomanikaj

Titulli: Kuptimi metafizik dhe dialektik i lëvizjes
Origjinali: Kuptimi metafizik dhe dialektik i lëvizjes
Gjinia: Shkenca natyrore
Autori: Robert Thomanikaj
Shtëpia botuese: Botime Vllamasi
Viti: 2015
Fq. 320
Pesha: 0.282 kg.
ISBN: 978-9928-179-87-6

Mbi librin

Autori i përket atij grupi njerëzish, të cilët e vërejnë natyrën me kënaqësi e kureshtje gjatë gjithë jetës. Si valët e detit, ashtu edhe vargmalet, e kanë çuar atë në idenë mbi një forcë rrotulluese universale në hapësirë të çdo lloj trupi, nga grimca të vogla e deri tek trupat e mëdhenj, planetë e diej, të cilët tërhiqen për shkak të ndryshimit të polaritetit të tyre, polaritet ky i cili, sipas autorit, duhet të ketë ekzistuar qysh në krijimin e materies.

Në këtë libër përmblidhet edhe "Fizika metafizike", në të cilën autori tregon rrugën e mbyllur ku e ka çuar kjo lloj fizike studimin e natyrës sot. Në këtë kapitull ai sqaron dhe kthen me kokë lart konceptin e entropisë, sqaron edhe një herë qartë me shembuj konceptin e relativitetit, duke i qëndruar besnik arsyes së shëndoshë deri tek shpejtësia maksimale në hapësirë, atë të dritës c, kështu duke e hedhur poshtë të ashtuquajturin paradoks i binjakëve.

Edhe teorinë e përgjithshme të relativitetit të Anjshtajnit, më gjithë hapësirën e saj dy – dimensionale, autori e hedh poshtë me argumente dhe shembuj, duke treguar qartë pse kjo hapësirë është tre – dimensionale dhe si e tillë na i shpalos aq qartë të gjitha fenomenet e natyrës.

Pas këtyre autori sjell edhe një panoramë të mekanikës kuantike, që lexuesi të kuptojë çfarë ai hedh poshtë nga kjo degë e këndvështrimit të theksuar metafizik dhe çfarë ai pranon nga studimet e kësaj dege.

Në katër forcat kryesore në natyrë, autori "eliminon" dy prej tyre, atë të dobët, duke e konsideruar si shenjë të jetëgjatësisë së një atomi, elementi, lënde, trupi të caktuar; si dhe atë të fortë, e cila sipas tij nuk duhet të llogaritet, pasi në elementë, lëndë apo trupa të caktuar, të ashtuquajturat grimca elementare përbëjnë tashmë lidhje të caktuara bërthamash atomesh, elementesh, lëndësh etj.

Vetëm e ashtuquajtura forcë elektromagnetike është bijë e forcës gravitacionale, ku e para ndikon më së shumti në elementë ferrorë (metalikë) dhe e dyta në të gjitha atomet, elementët dhe trupat, qysh nga krijimi i materies.